بۇل تۋرالى ق ر دەنساۋلىق ساقتاۋ ءمينيسترى الەكسەي سوي ءمالىم ەتتى.
كوروناۆيرۋس پەن پنيەۆمونيا جاعدايلارى بويىنشا دەرەكتەردىڭ مەيلىنشە اشىق بولۋىن قامتاماسىز ەتۋ ءۇشىن دەنساۋلىق ساقتاۋ مينيسترلىگى ستاتيستيكا جۇرگىزۋدىڭ جاڭا ادىستەرىن قابىلدايدى.
ددسۇ ەۋروپالىق وڭىرلىك بيۋروسىمەن تەحنيكالىق كەڭەس جۇرگىزىپ، COVID-19 جاعدايلارىن اۋرۋدى كلاسسيفيكاسيالاۋدىڭ جاڭا حالىقارالىق كودتارى بويىنشا تىركەۋگە كوشۋ تۋرالى شەشىم قابىلداندى. وسىلايشا، COVID-19-دىڭ زەرتحانالىق راستالعان جاعدايلارى پسر-تەستى تەرىس بولعان، ءبىراق COVID-19-دىڭ كلنيكالىق جانە ەپيدەميالىق بەلگىلەرى بار پنيەۆمونيا جاعدايلارىمەن بىرىكتىرىلەدى، - دەپ اتاپ ءوتتى ول.
COVID-19 كودتالۋىنا جاڭا كودتاردى پايدالانا وتىرىپ، اۋرۋدىڭ حالىقارالىق جىكتەلۋىنە تولىق كوشۋ 1 تامىزدان باستاپ جۇزەگە اسىرىلادى.
«جاڭا ستاتيستيكانى جۇرگىزۋ ءۇشىن COVID-19 اۋرۋىن كودتاۋ تۇرعىسىندا مەديسينالىق قىزمەتكەرلەردىڭ قۇزىرەتىن ارتتىرىپ، اقپاراتتىق جۇيەلەردى رەتتەپ، باسقا دا تەحنيكالىق ماسەلەلەردى رەتتەۋ كەرەك بولادى.
سونىمەن قاتار، دەنساۋلىق ساقتاۋ مينيسترلىگى ەسەپ جۇرگىزۋدەگى وزگەرىس قازاقستاننىڭ كوروناۆيرۋس ينفەكسياسىن جۇقتىرۋ مەن ءولىم-جىتىم بويىنشا حالىقارالىق رەيتينگتەگى پوزيسياسىنا جامان اسەر ەتەتىنىن ءتۇسىنىپ وتىر.
الايدا، بۇل ءادىس اۋرۋ جاعدايىنا دۇرىس بولجام جاساۋعا، قولداعى رەسۋرستى، ونىڭ ىشىندە مەديسينالىق كادرلاردى، توسەك-ورىندى، قۇرىلعىلاردى، دارى-دارمەكتى ويلى جوسپارلاۋعا، ستاتيستيكانى اشىق جۇرگىزۋگە مۇمكىندىك بەرەدى»، - دەدى الەكسەي سوي وكق-دا وتكەن باسپا ءسوز ءماسليحاتىندا.
مۇنىڭ الدىندا پرەزيدەنت توقايەۆ پاندەميا تۋرالى ەلگە شىنايى اقپارات جەتكىزۋ كەرەكتىگىن ايتقان.
"پاندەميا احۋالى تۋرالى بارلىق اقپارات قانشا جەردەن اششى بولسا دا، ونى قوعام بىلۋگە ءتيىس. جاريالىلىق پەن ءوزارا سەنىم بولعاندا عانا، ءبىز بىرلەسە وتىرىپ بۇل ىندەتتى تەزىرەك جەڭەمىز"، – دەپ جازدى توقايەۆ تۆيتتەردە.
