قازاقستاندا قارىزىن ٶتەۋدە قيىندىققا تاپ بولعان كومپانييالارعا مٸندەتتەمەلەرٸن قايتا جوسپارلاۋعا مٷمكٸندٸك بەرەتٸن جاڭا تەرتٸپ ەنگٸزۋ ۇسىنىلدى. بۇل تەتٸك كەسٸپورىنداردىڭ بانكروت بولۋىنا جول بەرمەي, جۇمىسىن جالعاستىرۋىنا جەنە كرەديتورلار الدىنداعى بەرەشەگٸن قايتارۋىنا كٶمەكتەسەدٸ, دەپ حابارلايدى dalanews.kz.
بۇل تۋرالى الماتىدا ٶتكەن دٶڭگەلەك ٷستەلدە قارجى نارىعىن رەتتەۋ جەنە دامىتۋ اگەنتتٸگٸ تٶراعاسىنىڭ ورىنباسارى نۇرجان تۇرسىنحانوۆ مەلٸمدەدٸ.
Bes.media مەلٸمەتٸنشە, ۇسىنىس بويىنشا بورىشكەر كومپانييا الدىمەن قارىزدى ٶتەۋ جوسپارى مەن الداعى قارجىلاي ەسەبٸن دايىندايدى. كەيٸن ونى نەگٸزگٸ كرەديتورلارمەن تالقىلاپ, داۋىسقا سالادى. قولداۋ تاپقان جوسپار سودان كەيٸن عانا سوتتىڭ قاراۋىنا جٸبەرٸلەدٸ.
سوت قۇجاتتاردى جەدەل تەرتٸپپەن قارايدى. اتاپ ايتقاندا, كەلٸسۋ رەسٸمدەرٸنٸڭ دۇرىس جٷرگٸزٸلگەنٸن, كرەديتورلارعا قاجەتتٸ اقپاراتتىڭ تولىق بەرٸلگەنٸن, داۋىس بەرۋ نەتيجەلەرٸن جەنە ۇسىنىلعان شارتتاردىڭ ەدٸلدٸگٸن تەكسەرەدٸ.
جوسپار سوتتا بەكٸتٸلسە, ونى قولداماعان كرەديتورلار دا قابىلدانعان تالاپتاردى ورىنداۋعا مٸندەتتٸ بولادى. الايدا ولاردىڭ مٷددەسٸ قورعالۋعا تيٸس. مەسەلەن, قارسى داۋىس بەرگەن كرەديتور كومپانييا تولىق تاراتىلعان جاعدايدا الاتىن سومادان از قاراجات الماۋى كەرەك.
قۇجات سوتتا قارالىپ جاتقاندا كومپانيياعا ۋاقىتشا قورعانىس بەرٸلەدٸ. وسى كەزەڭدە كرەديتورلار قارىزدى ٶز بەتٸنشە ٶندٸرٸپ الۋ شارالارىن باستاي المايدى.
جاڭا تەسٸلدٸڭ باستى ەرەكشەلٸگٸ – كەلٸسسٶزدەردٸڭ نەگٸزگٸ بٶلٸگٸ سوتقا جٷگٸنگەنگە دەيٸن جٷرگٸزٸلەدٸ. سونىڭ ارقاسىندا قارىزدى قايتا قۇرىلىمداۋ ۋاقىتى قىسقارىپ, ونىڭ نەتيجەسٸن الدىن الا بولجاۋ جەڭٸلدەيدٸ.
سونىمەن قاتار كرەديتورلاردى بٸرنەشە توپقا بٶلٸپ, ەر توپتىڭ بٶلەك داۋىس بەرۋ تەرتٸبٸن ەنگٸزۋ ۇسىنىلدى. جوسپاردى قابىلداۋ ٷشٸن قارىز تالاپتارىنىڭ جالپى قۇنى بويىنشا شامامەن 75% قولداۋ قاجەت بولادى. بەلگٸلٸ بٸر توپ قارسى بولعان جاعدايدا دا, تيٸستٸ تالاپتار ساقتالسا, سوت جوسپاردى بەكٸتە الادى.
بۇدان بٶلەك, تٶلەم قابٸلەتسٸزدٸگٸنە بايلانىستى كٷردەلٸ ٸستەردٸ قارايتىن سۋديالاردى مامانداندىرۋ كٶزدەلٸپ وتىر. الدىمەن ارنايى سوت قۇرامدارى جاساقتالىپ, كەيٸن وسىنداي ٸستەرگە ارنالعان جەكە سوت قۇرۋ مٷمكٸندٸگٸ قاراستىرىلماق.
تاعى بٸر ۇسىنىس – شەتەلدٸك كومپانييالار مەن كرەديتورلار قاتىساتىن بانكروتتىق رەسٸمدەرٸن حالىقارالىق تالاپتارعا سەيكەستەندٸرۋ. بۇل شەتەلدٸك سوتتارمەن جۇمىس ٸستەۋدٸ جەڭٸلدەتٸپ, حالىقارالىق داۋلاردى شەشۋ تەرتٸبٸن تٷسٸنٸكتٸرەك ەتۋگە تيٸس.
سونداي-اق وبليگاتسييا شىعارعان كومپانييا قارىزىن ٶتەي الماعان جاعدايدا ينۆەستورلاردىڭ ورتاق مٷددەسٸن قورعايتىن ارنايى سەنٸمگەر ٶكٸل ينستيتۋتىن ەنگٸزۋ جوسپارلانعان.
