Qazaqstanda qaryzyn óteýde qiyndyqqa tap bolǵan kompaniialarǵa mindettemelerin qaita josparlaýǵa múmkindik beretin jańa tártip engizý usynyldy. Bul tetik kásiporyndardyń bankrot bolýyna jol bermei, jumysyn jalǵastyrýyna jáne kreditorlar aldyndaǵy bereshegin qaitarýyna kómektesedi, dep habarlaidy dalanews.kz.
Bul týraly Almatyda ótken dóńgelek ústelde Qarjy naryǵyn retteý jáne damytý agenttigi tóraǵasynyń orynbasary Nurjan Tursynhanov málimdedi.
Bes.media málimetinshe, usynys boiynsha boryshker kompaniia aldymen qaryzdy óteý jospary men aldaǵy qarjylai esebin daiyndaidy. Keiin ony negizgi kreditorlarmen talqylap, daýysqa salady. Qoldaý tapqan jospar sodan keiin ǵana sottyń qaraýyna jiberiledi.
Sot qujattardy jedel tártippen qaraidy. Atap aitqanda, kelisý rásimderiniń durys júrgizilgenin, kreditorlarǵa qajetti aqparattyń tolyq berilgenin, daýys berý nátijelerin jáne usynylǵan sharttardyń ádildigin tekseredi.
Jospar sotta bekitilse, ony qoldamaǵan kreditorlar da qabyldanǵan talaptardy oryndaýǵa mindetti bolady. Alaida olardyń múddesi qorǵalýǵa tiis. Máselen, qarsy daýys bergen kreditor kompaniia tolyq taratylǵan jaǵdaida alatyn somadan az qarajat almaýy kerek.
Qujat sotta qaralyp jatqanda kompaniiaǵa ýaqytsha qorǵanys beriledi. Osy kezeńde kreditorlar qaryzdy óz betinshe óndirip alý sharalaryn bastai almaidy.
Jańa tásildiń basty ereksheligi – kelissózderdiń negizgi bóligi sotqa júgingenge deiin júrgiziledi. Sonyń arqasynda qaryzdy qaita qurylymdaý ýaqyty qysqaryp, onyń nátijesin aldyn ala boljaý jeńildeidi.
Sonymen qatar kreditorlardy birneshe topqa bólip, ár toptyń bólek daýys berý tártibin engizý usynyldy. Jospardy qabyldaý úshin qaryz talaptarynyń jalpy quny boiynsha shamamen 75% qoldaý qajet bolady. Belgili bir top qarsy bolǵan jaǵdaida da, tiisti talaptar saqtalsa, sot jospardy bekite alady.
Budan bólek, tólem qabiletsizdigine bailanysty kúrdeli isterdi qaraityn sýdialardy mamandandyrý kózdelip otyr. Aldymen arnaiy sot quramdary jasaqtalyp, keiin osyndai isterge arnalǵan jeke sot qurý múmkindigi qarastyrylmaq.
Taǵy bir usynys – sheteldik kompaniialar men kreditorlar qatysatyn bankrottyq rásimderin halyqaralyq talaptarǵa sáikestendirý. Bul sheteldik sottarmen jumys isteýdi jeńildetip, halyqaralyq daýlardy sheshý tártibin túsiniktirek etýge tiis.
Sondai-aq obligatsiia shyǵarǵan kompaniia qaryzyn ótei almaǵan jaǵdaida investorlardyń ortaq múddesin qorǵaityn arnaiy senimger ókil institýtyn engizý josparlanǵan.
