ۆيسە-پرەمەر سەرىك جۇمانعارين دەپۋتاتتاردىڭ ساۋالىنا بەرگەن جاۋابىندا پەداگوگ كادرلاردىڭ ساپاسىن ارتتىرۋ ءۇشىن قولعا الىنعان شارالار تۋرالى باياندادى، دەپ حابارلايدى Dalanews.kz.
ونىڭ ايتۋىنشا، مەملەكەت باسشىسىنىڭ تاپسىرماسىنا سايكەس، جوعارى ءبىلىم ساپاسىن جاقسارتىپ، ونى حالىقارالىق ءبىلىم كەڭىستىگىمەن ۇيلەستىرۋ ماقساتىندا جاڭا قارجىلاندىرۋ مودەلى ازىرلەنىپ جاتىر.
بۇل مودەل بىرنەشە نەگىزگى باعىتتى قامتيدى:
- ۇبت-نىڭ شەكتى بالىن كوتەرۋ؛
- شەتەلدىك ۇزدىك ۋنيۆەرسيتەتتەردى تارتۋ؛
- ءبىلىم گرانتتارىن سارالاپ بەرۋ؛
- ۇلتتىق رەيتينگ جۇيەسىن ەنگىزۋ؛
- مەملەكەتتىك ءبىلىم بەرۋ تاپسىرىسىن وقۋ ساپاسىنا قاراي ءبولۋ.
اتالعان وزگەرىستەردى جۇزەگە اسىرۋ ءۇشىن قاجەتتى زاڭنامالىق تۇزەتۋلەر 2024 جىلدىڭ 30 جەلتوقسانىندا ءماجىلىس قاراۋىنا ۇسىنىلعان.
سونىمەن قاتار ءجۇمانعاريننىڭ ايتۋىنشا، عىلىم جانە جوعارى ءبىلىم مينيسترلىگىنە وقۋ-اعارتۋ مينيسترلىگى جانە ءماجىلىس دەپۋتاتتارىمەن بىرلەسىپ بىرنەشە ماسەلەنى پىسىقتاۋ تاپسىرىلعان. اتاپ ايتقاندا:
- ءبىرىڭعاي تومەنگى شەكتى بالدى بەلگىلەۋ؛
- شەتەلدىك جوعارى وقۋ ورىندارىنان اۋىسىپ كەلۋ جانە قابىلداۋ ءتارتىبى؛
- پەداگوگيكالىق ماماندىقتارعا تۇسەتىندەر ءۇشىن قوسىمشا ەمتيحان ەنگىزۋ ماسەلەلەرى قارالۋى ءتيىس.
بۇل باستامالار كادرلارعا دەگەن سۇرانىستى دۇرىس بولجاۋ، مەملەكەتتىك تاپسىرىستى جوسپارلاۋ، ونى ءتيىمدى ءبولۋ جانە تۇلەكتەردى جۇمىسپەن قامتۋ جۇيەسىنە ساي جۇرگىزىلۋى كەرەك ەكەنى دە اتاپ وتىلگەن.
