قازاقستان رەسپۋبليكاسىنىڭ جوعارعى سوتى اقتوبە وبلىسى بويىنشا باسەكەلەستىكتى قورعاۋ جانە دامىتۋ اگەنتتىگىنىڭ دەپارتامەنتى «سنپس-اقتوبەمۇنايگاز» اق-عا قاتىستى جۇرگىزگەن مونوپولياعا قارسى تەرگەپ-تەكسەرۋ ناتيجەلەرىن زاڭدى جانە نەگىزدى دەپ تانىدى. وسىلايشا ەكى جىلعا سوزىلعان سوت پروسەسى اياقتالدى، دەپ حابارلايدى Dalanews.kz.
تەرگەپ-تەكسەرۋدى باستاۋعا مونوپولياعا قارسى ورگان جولداعان حابارلاما نەگىز بولدى. وندا باسەكەلەستىكتى قورعاۋ سالاسىنداعى زاڭنامانى بۇزۋ فاكتىلەرى كورسەتىلگەن بولاتىن. حابارلامادا اكسيونەرلىك قوعامعا كونتراگەنتتەرمەن جاسالعان شارتتارعا ءتيىستى وزگەرىستەر ەنگىزۋ ارقىلى بۇزۋشىلىقتاردى ەرىكتى تۇردە جويۋ ۇسىنىلعان. الايدا، بۇل تالاپ ورىندالماعاندىقتان، تەرگەپ-تەكسەرۋ باستالدى.
مونوپولياعا قارسى ورگان اكسيونەرلىك قوعامنىڭ نارىقتاعى ۇستەم جاعدايىن پايدالانىپ، كونتراگەنتتەرگە ەكونوميكالىق جاعىنان ءتيىمسىز شارتتار تاڭعانىن انىقتادى. اتاپ ايتقاندا، سۇيىتىلعان مۇناي گازىن (سمگ) جەتكىزۋ شارتتارىندا تولەم مەرزىمى قولدانىستاعى زاڭنامادا بەلگىلەنگەن بەس جۇمىس كۇنىنەن قىسقا – ءۇش بانكتىك كۇن رەتىندە بەلگىلەنگەن. بۇل تالاپپەن كەلىسپەگەن كونتراگەنتتەرگە جەتكىزۋ مۇلدەم جۇزەگە اسىرىلماعان.
سونىمەن قاتار، كومپانيا شارتتارعا تەحنولوگيالىق جاعىنان نەگىزسىز تالاپتاردى ەنگىزگەن. قوسىمشا كەلىسىمدەرگە سايكەس، اۆتوسيستەرنالار سمگ-مەن گەومەتريالىق كولەمىنىڭ 85%-نا دەيىن عانا تولتىرىلۋعا ءتيىس بولعان. نارىق قاتىسۋشىلارىنىڭ پىكىرىنشە، بۇل تالاپ تاۋاردى تولىق تاسىمالداۋعا مۇمكىندىك بەرمەي، لوگيستيكادا قوسىمشا قيىندىقتار تۋعىزعان. قالدىقتاردى تيەۋ ءۇشىن بەلگىلى ءبىر كولەمدەگى اۆتوسيستەرنالار قاجەت بولعاندىقتان، كونتراگەنتتەر اۋەل باستان تەڭسىز جاعدايعا تاپ بولعان.
تەرگەپ-تەكسەرۋ بارىسىندا، كومپانيادا تەحنيكالىق مۇمكىندىك بولا تۇرا، اۆتوكولىكپەن تاسىمالداناتىن سمگ ءوندىرىسىن نەگىزسىز شەكتەگەنى جانە سول ارقىلى نارىقتىڭ باسقا قاتىسۋشىلارىنىڭ قۇقىقتارىن بۇزعانى انىقتالدى.
مونوپولياعا قارسى ورگاننىڭ تەرگەپ-تەكسەرۋ قورىتىندىسى ءبىرىنشى جانە اپەللياسيالىق ساتىداعى سوتتارى، سونداي-اق جوعارعى سوتىندا تولىق قولداۋ تاپتى. جاقىن ۋاقىتتا ءىس ماتەريالدارى اقتوبە قالاسىنىڭ مامانداندىرىلعان اۋدانارالىق اكىمشىلىك سوتىنا ءتيىستى اكىمشىلىك شارالار قولدانۋ ماسەلەسىن قاراۋ ءۇشىن جولدانادى.
