Qazaqstan Respýblikasynyń Joǵarǵy soty Aqtóbe oblysy boiynsha Básekelestikti qorǵaý jáne damytý agenttiginiń departamenti «SNPS-Aqtóbemunaigaz» AQ-ǵa qatysty júrgizgen monopoliiaǵa qarsy tergep-tekserý nátijelerin zańdy jáne negizdi dep tanydy. Osylaisha eki jylǵa sozylǵan sot protsesi aiaqtaldy, dep habarlaidy Dalanews.kz.
Tergep-tekserýdi bastaýǵa monopoliiaǵa qarsy organ joldaǵan habarlama negiz boldy. Onda básekelestikti qorǵaý salasyndaǵy zańnamany buzý faktileri kórsetilgen bolatyn. Habarlamada Aktsionerlik qoǵamǵa kontragenttermen jasalǵan sharttarǵa tiisti ózgerister engizý arqyly buzýshylyqtardy erikti túrde joiý usynylǵan. Alaida, bul talap oryndalmaǵandyqtan, tergep-tekserý bastaldy.
Monopoliiaǵa qarsy organ Aktsionerlik qoǵamnyń naryqtaǵy ústem jaǵdaiyn paidalanyp, kontragentterge ekonomikalyq jaǵynan tiimsiz sharttar tańǵanyn anyqtady. Atap aitqanda, suiytylǵan munai gazyn (SMG) jetkizý sharttarynda tólem merzimi qoldanystaǵy zańnamada belgilengen bes jumys kúninen qysqa – úsh banktik kún retinde belgilengen. Bul talappen kelispegen kontragentterge jetkizý múldem júzege asyrylmaǵan.
Sonymen qatar, kompaniia sharttarǵa tehnologiialyq jaǵynan negizsiz talaptardy engizgen. Qosymsha kelisimderge sáikes, avtotsisternalar SMG-men geometriialyq kóleminiń 85%-na deiin ǵana toltyrylýǵa tiis bolǵan. Naryq qatysýshylarynyń pikirinshe, bul talap taýardy tolyq tasymaldaýǵa múmkindik bermei, logistikada qosymsha qiyndyqtar týǵyzǵan. Qaldyqtardy tieý úshin belgili bir kólemdegi avtotsisternalar qajet bolǵandyqtan, kontragentter áýel bastan teńsiz jaǵdaiǵa tap bolǵan.
Tergep-tekserý barysynda, kompaniiada tehnikalyq múmkindik bola tura, avtokólikpen tasymaldanatyn SMG óndirisin negizsiz shektegeni jáne sol arqyly naryqtyń basqa qatysýshylarynyń quqyqtaryn buzǵany anyqtaldy.
Monopoliiaǵa qarsy organnyń tergep-tekserý qorytyndysy birinshi jáne apelliatsiialyq satydaǵy sottary, sondai-aq Joǵarǵy sotynda tolyq qoldaý tapty. Jaqyn ýaqytta is materialdary Aqtóbe qalasynyń mamandandyrylǵan aýdanaralyq ákimshilik sotyna tiisti ákimshilik sharalar qoldaný máselesin qaraý úshin joldanady.
