قازاقستاندا زاڭگەرلەر، جۋرناليستەر جانە بەلسەندى ازاماتتار قىلمىستىق كودەكستىڭ 274-بابىن قىلمىستىق جاۋاپكەرشىلىكتەن الىپ، ونى اكىمشىلىك قۇقىقبۇزۋشىلىق ساناتىنا اۋىستىرۋدى تالاپ ەتۋدە، دەپ حابارلايدى Dalanews.kz.

ۇندەۋدە بۇل باپ قازىرگى تاڭدا ءسوز بوستاندىعىن شەكتەيتىن، قوعامدىق سىنعا قىسىم جاسايتىن جانە جۋرناليستەر مەن بەلسەندىلەرگە قىلمىستىق قۋدالاۋ ءقاۋپىن توندىرەتىن قۇرالعا اينالعانى اتالىپ وتكەن.

"قازاقستان رەسپۋبليكاسىنىڭ قىلمىستىق كودەكسىندەگى 274-باپ – ادەيى جالعان اقپارات تاراتقانى ءۇشىن جازالاۋ كوزدەلگەن نورما – ءىس جۇزىندە ءسوز ەركىندىگىن شەكتەپ، قوعامدىق سىنعا توسقاۋىل بولىپ وتىر. باپتىڭ باستاپقى ماقساتى – دەزينفورماسيامەن كۇرەسۋ بولعانىمەن، تاجىريبەدە ول الەۋمەتتىك جەلىدەگى پىكىرلەر مەن بۇقارالىق اقپارات قۇرالدارىنداعى سىني ماتەريالدار ءۇشىن قۋدالاۋعا ءجيى قولدانىلادى. بوستاندىقتان ايىرۋعا دەيىنگى اۋىر جازا بۇل قۇقىقبۇزۋشىلىقتىڭ سيپاتىنا مۇلدەم ساي كەلمەيدى جانە ادىلدىك پەن سورازمەرلىك قاعيداتتارىن بۇزادى"، – دەلىنگەن ۇندەۋدە.

274-باپتى دەكريميناليزاسيالاۋ تۋرالى بۇل ءوتىنىش e-Otinish پورتالى ارقىلى رەسمي تىركەلىپ، باس پروكۋراتۋراعا، كونستيتۋسيالىق سوتقا، سەنات پەن ماجىلىسكە جولدانعان. سونىمەن قاتار ونلاين-پەتيسيا دا ازىرلەنىپ جاتىر.

"ءبىز 274-باپ بويىنشا بەلسەندىلەر مەن جۋرناليستەرگە قاتىستى قوزعالعان نەگىزسىز قىلمىستىق ىستەردى دەرەۋ توقتاتۋدى تالاپ ەتەمىز. باپتى قىلمىستىق كودەكستەن شىعارىپ، اكىمشىلىك جاۋاپكەرشىلىككە اۋىستىرۋ بويىنشا زاڭناماعا تەزدەتىپ تۇزەتۋلەر ەنگىزۋ قاجەت. ءبىزدىڭ تالاپتارىمىز: جاۋاپكەرشىلىكتى اكىمشىلىك قۇقىقبۇزۋشىلىق تۋرالى كودەكسكە كوشىرۋ؛ ايىپپۇل تۇرىندەگى اكىمشىلىك جازا بەلگىلەۋ؛ بوستاندىقتان ايىرۋ مۇمكىندىگىن تولىق جويۋ"، – دەلىنگەن ۇندەۋدە.

قازاقستاندىق جانە حالىقارالىق قۇقىق قورعاۋ ۇيىمدارى دا ۇزاق جىلدار بويى «جالعان اقپارات» ءۇشىن قىلمىستىق جاۋاپكەرشىلىكتى سىنعا الىپ كەلەدى.