Qazaqstanda zańgerler, jýrnalıser jáne belsendi azamattar Qylmystyq kodekstiń 274-babyn qylmystyq jaýapkershilikten alyp, ony ákimshilik quqyqbuzýshylyq sanatyna aýystyrýdy talap etýde, dep habarlaıdy Dalanews.kz.

Úndeýde bul bap qazirgi tańda sóz bostandyǵyn shekteıtin, qoǵamdyq synǵa qysym jasaıtyn jáne jýrnalıser men belsendilerge qylmystyq qýdalaý qaýpin tóndiretin quralǵa aınalǵany atalyp ótken.

"Qazaqstan Respýblıkasynyń Qylmystyq kodeksindegi 274-bap – ádeıi jalǵan aqparat taratqany úshin jazalaý kózdelgen norma – is júzinde sóz erkindigin shektep, qoǵamdyq synǵa tosqaýyl bolyp otyr. Baptyń bastapqy maqsaty – dezınformasıamen kúresý bolǵanymen, tájirıbede ol áleýmettik jelidegi pikirler men buqaralyq aqparat quraldaryndaǵy synı materıaldar úshin qýdalaýǵa jıi qoldanylady. Bostandyqtan aıyrýǵa deıingi aýyr jaza bul quqyqbuzýshylyqtyń sıpatyna múldem saı kelmeıdi jáne ádildik pen sorazmerlik qaǵıdattaryn buzady", – delingen úndeýde.

274-bapty dekrımınalızasıalaý týraly bul ótinish e-Otinish portaly arqyly resmı tirkelip, Bas prokýratýraǵa, Konstıtýsıalyq sotqa, Senat pen Májiliske joldanǵan. Sonymen qatar onlaın-petısıa da ázirlenip jatyr.

"Biz 274-bap boıynsha belsendiler men jýrnalıserge qatysty qozǵalǵan negizsiz qylmystyq isterdi dereý toqtatýdy talap etemiz. Bapty qylmystyq kodeksten shyǵaryp, ákimshilik jaýapkershilikke aýystyrý boıynsha zańnamaǵa tezdetip túzetýler engizý qajet. Bizdiń talaptarymyz: jaýapkershilikti Ákimshilik quqyqbuzýshylyq týraly kodekske kóshirý; aıyppul túrindegi ákimshilik jaza belgileý; bostandyqtan aıyrý múmkindigin tolyq joıý", – delingen úndeýde.

Qazaqstandyq jáne halyqaralyq quqyq qorǵaý uıymdary da uzaq jyldar boıy «jalǵan aqparat» úshin qylmystyq jaýapkershilikti synǵa alyp keledi.