ىشكى ساۋدانى دامىتۋ شارالارىن ىسكە اسىرۋ اياسىندا ساۋدا سالاسىنداعى 400-دەن استام كاسىپكەر مەملەكەتتىك قولداۋ الدى. قازاقستان رەسپۋبليكاسىنىڭ ساۋدا جانە ينتەگراسيا مينيسترلىگى ساۋدا ينفراقۇرىلىمىن جاڭعىرتۋ، شاعىن جانە ورتا بيزنەستىڭ باسەكەگە قابىلەتتىلىگىن ارتتىرۋ ءۇشىن قولايلى جاعداي جاساۋ باعىتىندا جۇيەلى جۇمىس جۇرگىزۋدە،- دەپ حابارلايدى Dalanews.kz
بيىلعى جىلدىڭ باسىنان بەرى سۋبسيديالاۋ اياسىندا جالپى كرەديت سوماسى 57،5 ملرد تەڭگەنى قۇرايتىن 418 جوباعا قول قويىلدى. تولەنگەن سۋبسيديالاردىڭ جالپى سوماسى 2 788 ملن تەڭگەنى قۇرادى. سونىمەن قاتار، كەپىلدەندىرۋ قۇرالى بويىنشا كرەديت سوماسى 8 ملرد تەڭگەنى قۇرايتىن 103 كەپىلدىك بەرىلىپ، مەملەكەت تاراپىنان كەپىلدىكتەردىڭ كولەمى 3،6 ملرد تەڭگەنى قۇرادى.
ايماقتارداعى ساۋدا ينفراقۇرىلىمىن دامىتۋعا ەرەكشە كوڭىل بولىنۋدە. شىعىس قازاقستان وبلىسىندا قازىرگىۋاقىتتا مەملەكەتتىك قولداۋ اياسىندا ىشكى ساۋدا سالاسىندا شامامەن 7 ملرد تەڭگە بولاتىن 21 جوبا جۇزەگە اسىرىلۋدا. بازارلاردى جاڭعىرتۋدىڭ جول كارتاسى اياسىندا 2025 جىلى وسكەمەن قالاسىندا «زاريا»، «زارەچنىي» جانە «ورتالىق» اتتى ءۇش بازاردى جاڭارتۋ اياقتالادى. ونىڭ ىشىندە «زاريا» مەن «زارەچنىي» بازارلارى ساۋدا جانە ينتەگراسيا مينيسترلىگىنەن مەملەكەتتىك قولداۋ الدى.
ايماققا جۇمىس ساپارى بارىسىندا ساۋدا كوميتەتى ءتوراعاسىنىڭ ورىنباسارى ەرنۇر جاۋتىكبايەۆ جوبالاردىڭ جۇزەگە اسىرىلۋ بارىسىمەن تانىسىپ، ساۋدا نىساندارىن ارالاپ، ساۋدا الاڭدارىن جاڭعىرتۋداعى وڭ ديناميكاسىن اتاپ ءوتتى.
2002 جىلى پايدالانۋعا بەرىلگەن «زاريا» - ازىق-تۇلىك تاۋارلارى باسىم ۋنيۆەرسالدى بولشەك ساۋدا بازارى بولىىپ تابىلادى. 2024 جىلى مۇندا ورتالىق كوممۋنيكاسيالارعا قوسىلعان ەكى جاڭا ءبىر قاباتتى پاۆيلون سالىندى. مەملەكەتتىك قولداۋدىڭ ارقاسىندا بازار دامىپ جاتىر: 2025 جىلى اۆتوتۇراق ايماعى اباتتاندىرىلىپ، تاعى ەكى پاۆيلوننىڭ قۇرىلىسى جۇرگىزىلۋدە. نىسان وسى جىلدىڭ سوڭىنا دەيىن تولىق جاڭعىرتۋدان وتەدى دەپ جوسپارلانعان.
1999 جىلدان بەرى جۇمىس ىستەپ كەلە جاتقان «زارەچنىي» بازارى دا اۋقىمدى جاڭعىرتۋدان ءوتىپ جاتىر. ونىڭ اۋماعىندا 5 جابىق عيمارات جانە بىرنەشە ساۋدا قاتارى ورنالاسقان. وتكەن جىلدان باستاپ ستاسيونارلىق ساۋدا نىسانىنىڭ قۇرىلىسى جۇرگىزىلۋدە، ونى 2025 جىلدىڭ قىركۇيەگىندە اياقتاۋ جوسپارلانعان. ينجەنەرلىك جەلىلەردى تارتۋ جانە ىشكى ارلەۋ جۇمىستارى قارقىندى جۇرگىزىلىپ جاتىر. نىسان ءوز اۆتوتۇراعىمەن قامتاماسىز ەتىلگەن.
2000 جىلى پايدالانۋعا بەرىلگەن ورتالىق بازار ەكى نەگىزگى ستاسيونارلىق عيماراتتان تۇرادى، وندا ازىق-تۇلىك تە، ازىق-تۇلىكتەن تىس تاۋارلار دا ساتىلادى. سونىمەن قاتار اۋماعىندا پاۆيلوندار مەن ساۋدا قاتارلارى ورنالاسقان. بازارلاردى جاڭعىرتۋدىڭ جول كارتاسى اياسىندا بۇل نىساندا دا جۇمىستار جۇرگىزىلۋدە.
«ساۋدا بازارلارىن تولىق جاڭعىرتۋ - ۇكىمەتتىڭ باسىم مىندەتتەرىنىڭ ءبىرى. بۇل - زاڭ مەن ءتارتىپ جولى. ساۋدا مينيسترلىگى قاجەتتى نورماتيۆتىك-قۇقىقتىق بازانى تولىق ازىرلەدى. ەندى ساۋدا نىساندارى ءوز قىزمەتىن زاڭ تالاپتارىنا سايكەستەندىرۋى ءتيىس. ەڭ الدىمەن، بۇل — بيزنەستىڭ الەۋمەتتىك جاۋاپكەرشىلىگى. كەلەسى جىلدىڭ باسىنان باستاپ جاڭعىرتۋدان وتپەگەن بازارلار جۇمىسىن جالعاستىرا المايدى»، - دەدى ق ر ساۋدا جانە ينتەگراسيا مينيسترلىگىنىڭ ساۋدا كوميتەتى ءتوراعاسىنىڭ ورىنباسارى ەرنۇر جاۋتىكبايەۆ.
ەسكە سالايىق، ق ر ساۋدا مينيسترلىگى 2029 جىلعا قاراي ساۋدانىڭ زاماناۋي فورماتتارىنىڭ ۇلەسىن 70%-عا جەتكىزۋدى جوسپارلاپ وتىر. قازىرگى ۋاقىتتا بۇل كورسەتكىش 41%-دى قۇرايدى. ساۋدا بازارلارى دا زاماناۋي ستاندارتتارعا كوشۋى ءتيىس، ياعني ءورت قاۋىپسىزدىگى مەن سانيتارلىق-ەپيدەميولوگيالىق نورمالارعا سايكەس بولۋى، تولەمكارتالارى ارقىلى سالىق تۇسىمدەرىنىڭ اشىقتىعىن قامتاماسىز ەتۋى، سونداي-اق تۇتىنۋشىلارعا ىڭعايلى اۆتوتۇراق ايماقتارىمەن جابدىقتالۋى قاجەت.
