قازاقستاندا ەكى جەردە جۇمىس ىستەيتىندەر ەسەپكە الىنا ما؟ سەنات دالىزىندە جۋرناليستەردىڭ ساۋالىنا ەڭبەك جانە حالىقتى الەۋمەتتىك قورعاۋ ءبىرىنشى ۆيسە-مينيسترى اسقاربەك ەرتايەۆ جاۋاپ بەردى، دەپ حابارلايدى Dalanews.kz.

ونىڭ ايتۋىنشا، نەگىزگى جانە قىسقارتىلعان جۇمىس كۇنىمەن ەڭبەك ەتۋگە زاڭ تىيىم سالمايدى.

"ەگەر ازامات ءبىر جەردە تولىق، ال ەكىنشى ورىندا قىسقارتىلعان كۇنمەن ەڭبەك ەتسە، بۇل زاڭدى. قوسىمشا جۇمىس ىستەيتىندەردىڭ ناقتى سانىن ءبىز ەسەپكە المايمىز"، – دەدى ول.

ەڭبەك كودەكسىنە سايكەس ازامات بىرنەشە جەردە ەڭبەك ەتە الادى. الايدا بەلگىلى ءبىر شەكتەۋلەر بار: نەگىزگى جۇمىس ۋاقىتى 8 ساعاتتان، قوسىمشا جۇمىس 4 ساعاتتان اسپاۋعا ءتيىس. وسىلايشا جالپى جۇمىس كۇنى 12 ساعاتتان ارتىق بولماۋى كەرەك.

ال ەكى ورىندا دا تولىق جۇمىس كۇنىن اتقارۋعا زاڭ بويىنشا رۇقسات ەتىلمەيدى.