قالالىق ءدىن ىستەرى باسقارماسىنىڭ باسشىسى نۇرداۋلەت ءالمۇحانوۆ وسى ورايدا "قازاقستاندا ءدىني فيلمدەرگە سۇرانىس بار ما؟" دەگەن ساۋالعا جاۋاپ بەردى دەپ حابارلايدى Dalanews.kz.
ونىڭ ايتۋىنشا "جۇماق" ءفيلمى قىسقامەتراجدى بولعانىمەن، ماعىناسى مەن مازمۇنى تەرەڭ، فيلوسوفيالىق تۋىندى. فيلم كوپشىلىكتىڭ كوڭىلىنەن شىققان.
"فيلمگە تەرىس اعىمنىڭ ارباۋىنا ءتۇسىپ، اتا-اناسىنا قارسى سويلەپ، دوستارىمەن ارالاسپاي كەتكەن ەر ازاماتتىڭ وقيعاسى ارقاۋ بولدى. دەسترۋكتيۆتى ءدىني اعىمنىڭ تۇزاعىنا ءتۇسىپ قالعان ول تاياۋ شىعىسقا اتتانۋعا قامدانا باستايدى.
بۇل سوڭعى جىلداردىڭ اسا وزەكتى پروبلەماسى. ءفيلمدى ازداعان ۋاقىتتىڭ ىشىندە ميلليونعا جۋىق كورەرمەن كورىپ شىقتى. سان الۋان پىكىر جازىلدى، ولاردىڭ كەيبىرىن قويىن داپتەرىمەن ءتۇرتىپ الدىم.
اتا-انالار ۇل-قىزدارىنىڭ راديكالدى اعىمنىڭ جەتەگىنە ەرىپ كەتپەۋىن، ۇرپاعىنىڭ مۇنداي جولعا تۇسپەۋىن تىلەيدى. سودان دا بولار ءفيلمدى تاماشالاعان اۋديتوريانىڭ تاراپىنان مۇنداي دۇنيەنى مەكتەپ قابىرعاسىنان باستاپ كورسەتۋ قاجەت دەگەن ۇسىنىس ايتىلدى"، – دەيدى باسقارما باسشىسى.
ونىڭ پىكىرىنشە ءداستۇرلى ەمەس ءدىني اعىمداردىڭ ازعىرۋىنا ەرگەن كەيبىر ازاماتتار ءسالت-داستۇردى اتتاپ وتكىسى كەلەدى.
"ناماز وقىماعاندار شەتىنەن كاپىر، اتا-اناڭ نامازدا بولماسا ولار دا وسى ساپتا" دەپ كۇنى-تۇنى قۇلاعىنا قۇياتىن ءقاۋىپتى پروپاگاندانىڭ قۇلاقكەستى قۇلىنا اينالادى. سونىڭ سالدارىنان سان عاسىر بويى ءوزىنىڭ ومىرشەڭدىگىن جوعالتپاعان قازاق ادەبىنە دەگەن قۇرمەتى جوعالادى.
"راديكالدى ءدىني اعىمنىڭ تۇبەگەيلى تۇتقىنى بولىپ قالعان ازاماتتار مىنا ومىردەن باقىت، ماحاببات ىزدەمەيدى. ولار ءۇشىن سوعىس اشۋ، وسى جانجالدا شاحيد اتانۋ باستى مۇرات. "جۇماق" ءفيلمى وسىنداي كەيىپكەردىڭ كۇيىك پەن قاتەلىكتەن تۇراتىن ءومىرىن بايان ەتەدى"، – دەيدى ول.
فيلم جارىق كورگەننەن كەيىن "مۇنداي كونتەنت بىزگە كەرەك پە؟" دەگەن ساۋال قويىلعان. نۇرداۋلەت ءالمۇحانوۆتىڭ ايتۋىنشا ءدىني سالانى زەرتتەۋ، دۇرىس ناسيحات جۇرگىزۋدە مۇنداي ءونىم اۋاداي قاجەت. سول ارقىلى قوعامداعى پروبلەمالارعا ءۇڭىلىپ، كورەرمەنگە وي سالاسىز.
"ءدىني ءفيلمدى ەلگە ساباق بولسىن دەگەن نيەتپەن تۇسىردىك. الەۋمەتتىك جەلىدەگى دەرەككوزى جوق جالعان ءدىني اقپاراتتىڭ تۇڭعيىعىنا ءتۇسىپ كەتكەن جاستار بار، ولار وسى ءفيلمدى كورىپ اقىلعا كەلەر دەپ ويلايمىن.
ءدىني ساۋاتسىزدىق – وتە ءقاۋىپتى قۇبىلىس.
جاستار ءدىننىڭ اتىن جامىلعان تەرىس پيعىلداعى تۇلعالاردى تىڭداۋىن قويسا، كەز-كەلگەن ءدىني كونتەنتتى سۇزگىدەن وتكىزسە دەپ تىلەيمىن. ءدىن الەۋمەتتىك جەلىدەن وقي سالاتىن جەڭىل دۇنيە ەمەس. وعان وراشولاق قاراۋعا بولمايدى. ال ءدىني اقپارات العىڭىز كەلسە، iKomek109 نومىرىنە حابارلاسۋىڭىزعا بولادى"، – دەيدى نۇر-سۇلتان قالاسى ءدىن ىستەرى باسقارماسىنىڭ باسشىسى.
