BYD قىتايلىق اۆتوكونسەرنى بيىلعى توقسان قورىتىندىسى بويىنشا ساتىلىمىن 2 پايىزدان استامعا ازايتتى. China EV Data Tracker دەرەگىنشە، بۇل 2020 جىلدان بەرگى العاشقى تومەندەۋ. بۇعان دەيىن كومپانيانىڭ ساتىلىمى تۇراقتى ءوسىپ كەلگەن ەدى، تەك سوڭعى جاز ايلارىندا ءوسىمنىڭ قارقىنى باياۋلادى، دەپ حابارلايدى Dalanews.kz.

ال Geely كونسەرنى ءۇشىنشى توقساندا وتكەن جىلمەن سالىستىرعاندا 96 پايىزدىق ءوسىم تىركەدى.

BYD ءۇشىنشى توقساندا الەم بويىنشا 1 105 591 كولىك ساتقان. ساراپشىلاردىڭ ايتۋىنشا، كورسەتكىش ودان دا تومەن بولۋى مۇمكىن ەدى، ەگەر كەيبىر فاكتورلار بولماعاندا. ماسەلەن، ەكسپورت كولەمى 146 پايىزعا ءوسىپ، 232،8 مىڭ ماشيناعا جەتكەن. سونداي-اق تازا ەلەكتروموبيلدەرگە سۇرانىس شامامەن ۇشتەن بىرىنە ارتىپ، 582،5 مىڭ كولىك ساتىلعان.

قىركۇيەك ايىندا كومپانيا ساتىلىمى جالپى ەسەپپەن 6 پايىزعا تومەندەسە، BYD نەگىزگى برەندىنە سۇرانىس بىردەن 11،6 پايىزعا ازايعان. بۇل اسىرەسە ىشكى نارىقتا ايقىن بايقالادى.
ال گيبريدتى مودەلدەرگە سۇرانىس التى اي قاتارىنان قۇلدىراپ كەلەدى. قىركۇيەكتە تومەندەۋ 25 پايىزدى قۇرادى.

سونىمەن قاتار BYD-دىڭ باسقا ماركالارى كەرىسىنشە ءوسىم كورسەتۋدە.

FangChengBao جول تالعامايتىن كولىكتەرىنىڭ ساتىلىمى وتكەن جىلمەن سالىستىرعاندا 345 پايىزعا ارتتى (شامامەن 24 مىڭ كولىك)؛

Yangwang پرەميۋم ماركاسىنىڭ ساتىلىمى 145 پايىزعا كوبەيىپ، 758 كولىككە جەتتى.

ساتىپ الۋشىلاردىڭ قىزىعۋشىلىعى ارتقانىنا قاراماستان، جالپى ساتىلىم سانى بويىنشا Geely ءالى دە BYD-دان تومەن تۇر. دەگەنمەن ونىڭ مودەلدىك لينەەكالارىنىڭ تانىمالدىعى ءوسىپ كەلەدى. ماسەلەن، Geely Galaxy سەرياسىنىڭ قىركۇيەكتەگى ساتىلىمى ءبىر جىل ىشىندە 130 پايىزدان استام ءوسىپ، رەكوردتىق 120 868 كولىككە جەتكەن.

كۇزدە سونداي-اق Xiaomi، Xpeng جانە Leapmotor سىندى جاڭا ستارتاپتاردىڭ دا تاريحي كورسەتكىشتەرى تىركەلىپ وتىر.