قازاقستاندا كامەلەتكە تولماعاندارعا قارسى اۋىر جانە اسا اۋىر قىلمىستار سانى ازايعان، دەپ حابارلايدى Dalanews.kz. 

بۇل تۋرالى بالالار قۇقىقتارى جونىندەگى ۋاكىل دينارا زاكييەۆا حابارلادى. ول پرەزيدەنت تاپسىرماسى بويىنشا بالالارعا زورلىق-زومبىلىق ءۇشىن جازانى قاتاڭداتۋ جونىندەگى ەكى جىلدىق جۇمىستىڭ قورىتىندىسىن ۇسىندى.

ومبۋدسمەننىڭ ايتۋىنشا، سوڭعى ەكى جىلدا ەلدە بالالاردىڭ قۇقىقتارىن قورعاۋدىڭ تۇتاس جۇيەسى قۇرىلدى. ايماقتاردا اكىمدىكتەر جانىنان ارنايى باسقارمالار، وتباسىن قولداۋ ورتالىقتارى، ءموبيلدى توپتار مەن بايلانىس ورتالىعى اشىلعان. سونداي-اق مەكتەپتەردە بالالارمەن تىكەلەي بايلانىس ورناتۋعا مۇمكىندىك بەرەتىن QR 111 جۇيەسى ەنگىزىلدى.

قىلمىستار ازايىپ، ءسۋيسيدتىڭ الدىن الۋ شارالارى كۇشەيدى

2025 جىلدىڭ توعىز ايىندا كامەلەتكە تولماعانداردىڭ جىنىستىق قول سۇعىلماۋشىلىعىنا قارسى قىلمىستار 18%، ال پەدوفيليا فاكتىلەرى 24% تومەندەگەن. سونىمەن قاتار، بالالارعا قاتىستى كىسى ءولتىرۋ جانە وزگە دە اۋىر قىلمىستار سانى ازايعان.

بالالار اراسىنداعى وز-وزىنە قول جۇمساۋدىڭ الدىن الۋعا ەرەكشە نازار اۋدارىلۋدا. ايماقتاردا پسيحولوگيالىق كومەك ورتالىقتارى اشىلىپ جاتىر. سونىڭ ناتيجەسىندە، سوڭعى ون جىلدا العاش رەت الماتى وبلىسىندا سۋيسيد فاكتىلەرىنىڭ ازايعانى تىركەلدى.

دينارا زاكييەۆا اتاپ وتكەندەي، بالالار ءسۋيسيدىنىڭ شامامەن 60% وتباسىنداعى كيكىلجىڭدەرمەن بايلانىستى.

ول اتا-انالاردى ءوز بالالارىنا كوبىرەك سۇيىسپەنشىلىك، قامقورلىق جانە نازار بولۋگە شاقىردى.