قازاقستان اۋماعىندا تانىمال اۆياتسييالىق تەحنيكا ٶندٸرۋشٸ Airbus كومپانيياسىنىڭ رەسمي ٶكٸلدٸگٸ اشىلاتىن بولدى. بۇل تۋرالى ٷكٸمەتتە ٶتكەن بريفينگتە بٸرٸنشٸ ۆيتسە-پرەمەر رومان سكليار مەلٸمدەدٸ, دەپ حابارلايدى Dalanews.kz.
ونىڭ ايتۋىنشا, قازاقستان Airbus ۇشاقتارى مەن تٸكۇشاقتارىن تۇراقتى تٷردە ساتىپ الاتىن بولعاندىقتان, كومپانييانىڭ سەرۆيستٸك قىزمەت كٶرسەتۋ ورتالىعىن دا ەلٸمٸزدە اشۋ قاجەتتٸگٸ تۋىنداعان.
«بٸز Airbus كومپانيياسىنان ۇشاقتار مەن تٸكۇشاقتار ساتىپ الامىز. سوندىقتان وسى ەۋە كٶلٸكتەرٸنە قىزمەت كٶرسەتۋ ورتالىعىنىڭ قازاقستاندا بولۋى ٶتە ماڭىزدى. شەتەلدەن ساتىپ الىنعان تەحنيكاعا سەرۆيستٸك قىزمەت كٶرسەتۋدٸڭ ٶز ەلٸمٸزدە ەمەس, سىرت مەملەكەتتەردە جٷرگٸزٸلۋٸ دۇرىس ەمەس. الماتىدا تٸكۇشاقتاردى جٶندەۋ بويىنشا سەتتٸ تەجٸريبەمٸز بار. وسى تەجٸريبەنٸ كەڭەيتٸپ, Airbus ٶكٸلدٸگٸن اشۋدى جوسپارلاپ وتىرمىز», – دەدٸ سكليار.
سونىمەن قاتار, بٸرٸنشٸ ۆيتسە-پرەمەر «قازاقستان اۆياتسييالىق يندۋستريياسى» كومپانيياسىنىڭ قازٸرگٸ اۋىر قارجىلىق جاعدايىنا دا توقتالدى.
«ٶكٸنٸشكە قاراي, بۇل كومپانييا قيىن قارجىلىق جاعدايدا تۇر. بۇعان كومپانييا باسشىلىعى مەن اكتسيونەرلەرٸنٸڭ جاۋاپسىز ەرەكەتتەرٸ سەبەپ بولدى. قازٸر بۇل جاعداي بويىنشا قىلمىستىق ٸس قوزعالدى», – دەپ اتاپ ٶتتٸ سكليار.
