Qazaqstan aýmaǵynda tanymal aviatsiialyq tehnika óndirýshi Airbus kompaniiasynyń resmi ókildigi ashylatyn boldy. Bul týraly Úkimette ótken brifingte birinshi vitse-premer Roman Skliar málimdedi, dep habarlaidy Dalanews.kz.
Onyń aitýynsha, Qazaqstan Airbus ushaqtary men tikushaqtaryn turaqty túrde satyp alatyn bolǵandyqtan, kompaniianyń servistik qyzmet kórsetý ortalyǵyn da elimizde ashý qajettigi týyndaǵan.
«Biz Airbus kompaniiasynan ushaqtar men tikushaqtar satyp alamyz. Sondyqtan osy áýe kólikterine qyzmet kórsetý ortalyǵynyń Qazaqstanda bolýy óte mańyzdy. Shetelden satyp alynǵan tehnikaǵa servistik qyzmet kórsetýdiń óz elimizde emes, syrt memleketterde júrgizilýi durys emes. Almatyda tikushaqtardy jóndeý boiynsha sátti tájiribemiz bar. Osy tájiribeni keńeitip, Airbus ókildigin ashýdy josparlap otyrmyz», – dedi Skliar.
Sonymen qatar, birinshi vitse-premer «Qazaqstan aviatsiialyq indýstriiasy» kompaniiasynyń qazirgi aýyr qarjylyq jaǵdaiyna da toqtaldy.
«Ókinishke qarai, bul kompaniia qiyn qarjylyq jaǵdaida tur. Buǵan kompaniia basshylyǵy men aktsionerleriniń jaýapsyz áreketteri sebep boldy. Qazir bul jaǵdai boiynsha qylmystyq is qozǵaldy», – dep atap ótti Skliar.
