NOAA دەرەكتەرىنە سايكەس، جەلتوقساندا لا-نينيا قۇبىلىسى ءالى دە جالعاسىپ جاتىر. Pavlov analytics تەلەگرام ارناسى ونىڭ كليماتقا، اۋىل شارۋاشىلىعىنا جانە سۋ رەسۋرستارىنا ىقتيمال اسەرى جونىندەگى قىسقاشا بولجام جاساعان، دەپ حابارلايدى Dalanews.kz.

2025/26 جىلعى قىس

ەلدىڭ سولتۇستىك-شىعىسى مەن شىعىس ايماقتارىندا اركتيكالىق سۋىقتىڭ ءجيى بولادى. كۇشەيگەن ءسىبىر انتيسيكلونى ۇزاققا سوزىلاتىن اياز الىپ كەلۋى ابدەن مۇمكىن.

وڭتۇستىك، باتىس جانە ورتالىق وڭىرلەردە جاۋىن-شاشىن مولشەرى نورمادان تومەن بولادى دەپ بولجانسا، التايدا، كەرىسىنشە، قاردىڭ مول ءتۇسۋى ىقتيمال.

قاۋىپتەر: ەنەرگەتيكالىق جۇيەگە تۇسەتىن جۇكتەمەنىڭ ارتۋى، ينفراقۇرىلىمنىڭ مۇز باسۋى، مال شارۋاشىلىعى ءۇشىن قولايسىز جاعدايلار.

2026 جىلعى كوكتەم

لا-نينيا السىرەگەن كۇننىڭ وزىندە ونىڭ اسەرى ناۋرىز–ءساۋىر ايلارىنا دەيىن ساقتالۋى مۇمكىن.
بۇل اسىرەسە قازاقستاننىڭ وڭتۇستىگى مەن باتىسىندا جىلى ءارى قۇرعاق كوكتەم بولۋ ىقتيمالدىعىن ارتتىرادى.

شىعىس وڭىرلەر مەن سولتۇستىك قازاقستاندا قار جامىلعىسىنىڭ تەز ەرۋى سۋدىڭ ەرتە كەتۋىنە جانە ەگىس ناۋقانى باستالعانعا دەيىن-اق ىلعال تاپشىلىعىنا الىپ كەلۋى ىقتيمال.

شاڭدى داۋىلدار بولۋى، جايىلىمداردىڭ جاعدايى ناشارلاۋى مۇمكىن.

2026 جىلعى جاز

تاريحي دەرەكتەرگە سۇيەنسەك، لا-نينيادان كەيىن ورتالىق ازيادا، ENSO بەيتاراپ كەزەڭگە وتسە دە، جاز ادەتتە ىستىق ءارى قۇرعاق بولادى.

سوعان بايلانىستى ورمان جانە دالا ورتتەرىنىڭ ءقاۋپى كۇشەيەدى (قوستاناي، پاۆلودار، اباي، ۇلىتاۋ، شىعىس قازاقستان وبلىستارى).

ماۋسىم–تامىز ايلارىندا جاۋىن-شاشىن مولشەرى نورمادان تومەن بولۋى مۇمكىن، بۇل ەگىنشىلىك باسىم وڭىرلەردە جازدىق بيدايدىڭ ونىمدىلىگى تومەندەۋ ءقاۋپىن ارتتىرادى. قىزىلوردا، تۇركىستان جانە جامبىل وبلىستارىندا سۋ تاپشىلىعىنىڭ كۇشەيۋ ىقتيمالدىعى جوعارى.

ساراپشىلار بۇل ناقتى بولجام ەمەس ەكەنىن،تەك رەسمي اقپاراتقا عانا سەنۋ كەرەگىن اتاپ ءوتتى.