تاياۋ شىعىستاعى شيەلەنىس الەمدىك مۇناي نارىعىنداعى تۇراقسىزدىقتى كۇشەيتكەن. الايدا قازاقستاننىڭ رەسپۋبليكالىق بيۋدجەتىنە نەگىزگى اسەر ەتكەن فاكتور - تەڭگە باعامى. بۇل تۋرالى قارجى ءمينيسترى ءمادي تاكييەۆ مالىمدەدى، دەپ حابارلايدى Dalanews.kz.

ءمينيستردىڭ ايتۋىنشا، ەسەپتى توقساندا بيۋدجەت كىرىسىنە سىرتقى ماكروەكونوميكالىق جاعدايلار ايتارلىقتاي ىقپال ەتكەن. وسى كەزەڭدە مۇنايدىڭ ورتاشا باعاسى باررەلىنە 80،6 دوللار دەڭگەيىندە قالىپتاسقان.

سونىمەن قاتار، مۇناي باعاسى وسۋىنەن تۇسكەن قوسىمشا تابىستىڭ باسىم بولىگى تىكەلەي بيۋدجەتكە تۇسپەيدى. قولدانىستاعى جۇيەگە ساي نەگىزگى مۇناي كىرىستەرى ۇلتتىق قورعا جيناقتالادى.

قارجى ءمينيسترىنىڭ سوزىنشە، بيۋدجەتكە وڭ اسەر كوبىنە مۇناي ەكسپورتتىق كەدەندىك باج ارقىلى بايقالعان. بۇل باعىتتا قوسىمشا 40،5 ملرد تەڭگە تۇسكەن.

الايدا تەڭگەنىڭ نىعايۋى كەرىسىنشە كىرىستى تەجەگەن. ەسەپتى كەزەڭدە ورتاشا باعام 497،7 تەڭگە دەڭگەيىندە قالىپتاسىپ، بولجانعان 540 تەڭگەدەن تومەن بولعان. سونىڭ سالدارىنان بيۋدجەتكە شامامەن 146 ملرد تەڭگە كەم تۇسكەن.

مينيستر بۇل ايىرماشىلىقتى بيۋدجەت كىرىسىن شەكتەگەن نەگىزگى فاكتور رەتىندە اتادى.