سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ دۇنيەجۇزىلىك بانكتىڭ تۇراقتى وكىلىمەن كەزدەسۋ وتكىزدى. تاراپتار سولتۇستىك ارال تەڭىزىن ساقتاۋ جانە سۋ شارۋاشىلىعى ينفراقۇرىلىمىن دامىتۋعا باعىتتالعان بىرلەسكەن جوبالاردى ىسكە اسىرۋ تەتىكتەرىن تالقىلادى، دەپ حابارلايدى Dalanews.kz.
كەزدەسۋدىڭ نەگىزگى تاقىرىبى — سولتۇستىك ارالدى ساقتاۋ جوباسىنىڭ ەكىنشى كەزەڭى بولدى. ونىڭ اياسىندا تەڭىزدەگى سۋ دەڭگەيىن كوتەرۋ ماقساتىندا كوكارال بوگەتىن قايتا جاڭعىرتۋ كوزدەلىپ وتىر.
قازىرگى ۋاقىتتا جوبانى ازىرلەۋ جۇمىستارى اياقتالۋ ساتىسىندا.
سونىمەن قاتار قىزىلوردا وبلىسىنداعى يرريگاسيالىق جەلىلەردى قالپىنا كەلتىرۋ جوباسىنا دايىندىق جۇرگىزىلۋدە. بۇل جوباعا سيفرلاندىرۋ مەن اۆتوماتتاندىرۋ ەلەمەنتتەرىن ەنگىزۋ جوسپارلانعان.
«بۇل باستامانى ىسكە اسىرۋ سۋ رەسۋرستارىن پايدالانۋدىڭ تيىمدىلىگىن ارتتىرىپ، ۇنەمدەلگەن سۋدى سولتۇستىك ارال تەڭىزىنە باعىتتاۋعا مۇمكىندىك بەرەدى»، – دەپ ناقتىلادى سۋ رەسۋرستارى مينيسترلىگىندە.
قازىرگى تاڭدا بارلىق جوبالار مەملەكەتتىك ساراپتامادان ءوتىپ جاتىر.
