"قاستەر مۇساحانۇلىنا، مۇراگەر ءالىمۇلىنا جانە قايشا اقانعا قازاقستان رەسپۋبليكاسىنىڭ ازاماتتىعى بەرىلمەيتىن بولدى. ولاردى ەندى قىتايعا قايتارا ما؟ جالپى وسىنداي ماسەلەلەر قالاي رەتتەلەدى؟"، – دەگەن سۇراق قويىلدى ورتالىق كوممۋنيكاسيالار قىزمەتىندە.
"مەن ناقتى ايتا الامىن، بۇل ازاماتتاردى قىتايعا قايتارۋ ماسەلەسى مۇلدەم قارالىپ جاتقان جوق. سەبەبى بۇل باۋىرلارىمىز "بوسقىن" مارتەبەسىن العان ەدى. بوسقىن مارتەبەسىن الىپ، ءقازىر جۇمىس ىستەۋگە، تۇرۋعا قۇقىلى. ءبىراق، دەگەنمەن، ولار مەملەكەتتىك شەكارانى بۇزعانى ءۇشىن جاۋاپقا تارتىلعان بولاتىن. ولار تەك مەملەكەتتىك شەكارانى بۇزعانى ءۇشىن ءبىر جىلعا جازالاندى. ءقازىر بوسقىن مارتەبەسىنە يە. كەلەسى جىلدان باستاپ، حالىقارالىق تاجىريبەگە سايكەس ءتيىستى وزگەرىستەر ىشكى ىستەر مينيسترلىگىندە قارالىپ جاتىر. ەركىن ءجۇرىپ-تۇرۋىنا، ەلدەن شىعىپ نەمەسە قايتىپ كىرۋىنە جاعداي جاسالادى. ءبىراق كەلەسى جىلى، ءقازىر مۇنىڭ بارلىعى پىسىقتالىپ جاتىر"، – دەپ ءتۇسىندىردى "وتانداستار" قورىنىڭ وكىلى.
ايتا كەتەيىك، 2019 جىلى قازان ايىندا ەكى قانداسىمىز قىتايدىڭ شىڭجاڭ-ۇيعىر اۆتونوميالىق اۋدانىنان قاشىپ كەلگەن. سول كەزدە ولاردى ەكى ايعا قاماۋعا الدى.
ال ۇلتتىق قاۋىپسىزدىك كوميتەتى ەكەۋىنىڭ مەملەكەتتىك شەكارانى قالاي كەسىپ وتكەنى ۇلكەن كۇمان تۋدىراتىنىن مالىمدەدى.
2020 جىلدىڭ 21 قاڭتار كۇنى قازاقستان شەكاراسىن زاڭسىز ءوتتى دەپ ايىپتالعان قاستەر مۇساحان ۇلى مەن مۇراگەر ءالىمۇلىنا قاتىستى سوت ۇكىمى شىقتى. قاستەر مۇساحان ۇلى مەن مۇراگەر ءالىم ۇلى 392 باپتىڭ 1 بولىمىندە كورسەتىلگەندەي ءبىر جىل مەرزىمدە باس بوستاندىعىنان ايىرۋ جازاسى تاعايىندالعان بولاتىن.
