"Qaster Musahanulyna, Murager Álimulyna jáne Qaisha Aqanǵa Qazaqstan Respýblikasynyń azamattyǵy berilmeitin boldy. Olardy endi Qytaiǵa qaitara ma? Jalpy osyndai máseleler qalai retteledi?", – degen suraq qoiyldy ortalyq kommýnikatsiialar qyzmetinde.
"Men naqty aita alamyn, bul azamattardy Qytaiǵa qaitarý máselesi múldem qaralyp jatqan joq. Sebebi bul baýyrlarymyz "bosqyn" mártebesin alǵan edi. Bosqyn mártebesin alyp, qazir jumys isteýge, turýǵa quqyly. Biraq, degenmen, olar memlekettik shekarany buzǵany úshin jaýapqa tartylǵan bolatyn. Olar tek memlekettik shekarany buzǵany úshin bir jylǵa jazalandy. Qazir bosqyn mártebesine ie. Kelesi jyldan bastap, halyqaralyq tájiribege sáikes tiisti ózgerister Ishki ister ministrliginde qaralyp jatyr. Erkin júrip-turýyna, elden shyǵyp nemese qaityp kirýine jaǵdai jasalady. Biraq kelesi jyly, qazir munyń barlyǵy pysyqtalyp jatyr", – dep túsindirdi "Otandastar" qorynyń ókili.
Aita keteiik, 2019 jyly qazan aiynda eki qandasymyz Qytaidyń Shyńjań-Uiǵyr avtonomiialyq aýdanynan qashyp kelgen. Sol kezde olardy eki aiǵa qamaýǵa aldy.
Al ulttyq qaýipsizdik komiteti ekeýiniń memlekettik shekarany qalai kesip ótkeni úlken kúmán týdyratynyn málimdedi.
2020 jyldyń 21 qańtar kúni Qazaqstan shekarasyn zańsyz ótti dep aiyptalǵan Qaster Musahanuly men Murager Álimulyna qatysty sot úkimi shyqty. Qaster Musahanuly men Murager Álimuly 392 baptyń 1 bóliminde kórsetilgendei bir jyl merzimde bas bostandyǵynan aiyrý jazasy taǵaiyndalǵan bolatyn.
