«ۇلتتىق وركەندەۋگە جاردەم قورىنىڭ» ديرەكتورى، دوكتور ۇسەن سۇلەيمەن ۆارشاۆادا وتكەن ەقىۇ/دياقب حالىقارالىق الاڭىندا قازاقستاننىڭ ادام قۇقىقتارى، زاڭ ۇستەمدىگى جانە الەۋمەتتىك-ەكونوميكالىق دامۋ سالاسىنداعى كوزقاراسىن تانىستىردى، دەپ حابارلايدى Dalanews.kz.
ءوز سوزىندە ول قازاقستاننىڭ ادام قۇقىقتارىنىڭ جالپىعا بىردەي دەكلاراسياسىندا جانە بۇۇ-نىڭ نەگىزگى شارتتارىندا بەكىتىلگەن حالىقارالىق ستاندارتتاردى قاتاڭ ۇستاناتىنىن اتاپ ءوتتى. سونداي-اق، ەلدە اۋقىمدى قۇقىقتىق رەفورمالار جۇرگىزىلىپ جاتقانىن ايتتى. 2022 جىلدان بەرى سوت جۇيەسىن جەتىلدىرۋگە، ازاماتتاردىڭ قۇقىقتارىن قورعاۋعا جانە مەملەكەتتىك قىزمەتتەردى سيفرلاندىرۋعا باعىتتالعان 200-دەن استام جاڭا زاڭ قابىلداندى.
سۇلەيمەن ەكونوميكالىق ءوسىم مەن ادام قۇقىقتارىنىڭ ءوزارا بايلانىسىنا ەرەكشە نازار اۋداردى: حالىقارالىق ۆاليۋتا قورىنىڭ بولجامى بويىنشا، قازاقستاننىڭ ءجىو-ى 2025 جىلى 259 ملرد اقش دوللارىنا جەتىپ، 2028 جىلعا قاراي 354 ملرد دوللارعا دەيىن وسەدى. ونىڭ ايتۋىنشا، بۇل كورسەتكىشتەر سوت رەفورمالارىنا، قۇقىق قورعاۋ ينستيتۋتتارىنا جانە الەۋمەتتىك باعدارلامالارعا ينۆەستيسيا سالۋعا مۇمكىندىك بەرەدى.
ءسوزىن قورىتىندىلاي كەلە، سۇلەيمەن قازاقستاننىڭ حالىقارالىق كونۆەنسيالارعا قوسىلۋ بويىنشا ايماق ەلدەرىنىڭ كوپشىلىگىنەن وزىق ەكەنىن اتاپ ءوتتى. الايدا، كەيبىر باتىس سەرىكتەستەر تاراپىنان سىنشىل ريتوريكانىڭ ساقتالىپ وتىرعانىنا وكىنىش ءبىلدىردى. ول اشىق ديالوگ پەن ءوزارا تۇسىنىستىككە شاقىرىپ، ورنىقتى دامۋ ەكونوميكالىق ءوسىم مەن ادام قۇقىقتارىنىڭ تەپە-تەڭدىگى ارقىلى عانا مۇمكىن بولاتىنىن ايتتى.
