«Ұлттық өркендеуге жәрдем қорының» директоры, доктор Үсен Сүлеймен Варшавада өткен ЕҚЫҰ/ДИАҚБ халықаралық алаңында Қазақстанның адам құқықтары, заң үстемдігі және әлеуметтік-экономикалық даму саласындағы көзқарасын таныстырды, деп хабарлайды Dalanews.kz.
Өз сөзінде ол Қазақстанның Адам құқықтарының жалпыға бірдей декларациясында және БҰҰ-ның негізгі шарттарында бекітілген халықаралық стандарттарды қатаң ұстанатынын атап өтті. Сондай-ақ, елде ауқымды құқықтық реформалар жүргізіліп жатқанын айтты. 2022 жылдан бері сот жүйесін жетілдіруге, азаматтардың құқықтарын қорғауға және мемлекеттік қызметтерді цифрландыруға бағытталған 200-ден астам жаңа заң қабылданды.
Сүлеймен экономикалық өсім мен адам құқықтарының өзара байланысына ерекше назар аударды: Халықаралық валюта қорының болжамы бойынша, Қазақстанның ЖІӨ-і 2025 жылы 259 млрд АҚШ долларына жетіп, 2028 жылға қарай 354 млрд долларға дейін өседі. Оның айтуынша, бұл көрсеткіштер сот реформаларына, құқық қорғау институттарына және әлеуметтік бағдарламаларға инвестиция салуға мүмкіндік береді.
Сөзін қорытындылай келе, Сүлеймен Қазақстанның халықаралық конвенцияларға қосылу бойынша аймақ елдерінің көпшілігінен озық екенін атап өтті. Алайда, кейбір батыс серіктестер тарапынан сыншыл риториканың сақталып отырғанына өкініш білдірді. Ол ашық диалог пен өзара түсіністікке шақырып, орнықты даму экономикалық өсім мен адам құқықтарының тепе-теңдігі арқылы ғана мүмкін болатынын айтты.
