كاسپيي قۇبىر كونسورسيۋمىنىڭ (كقك) نوۆوروسسييسك ماڭىنداعى تەڭىز تەرمينالىنىڭ اكىمشىلىك عيماراتىنا پيلوتسىز ۇشۋ اپپاراتتارى (دروندار) شابۋىل جاسادى، دەپ حابارلايدى Dalanews.kz.
“2025 جىلدىڭ 25 قاراشاسىنا قاراعان تۇندە نوۆوروسسييسك تەڭىز ايلاعىنا جاسالعان درون سوققىسىنىڭ سالدارىنان كقك تەڭىز تەرمينالىنىڭ اكىمشىلىك كورپۋسى سوققى بولىگىنىڭ زاقىمداۋشى ەلەمەنتتەرىنەن ءبۇلىندى. وڭتۇستىك وزەرەيەۆكا اۋىلىندا كقك-نىڭ باستى باسقارۋ ورتالىعى ورنالاسقان. سول جەردەن تەڭىز – نوۆوروسسييسك قۇبىر جەلىسىنىڭ قازاقستان مەن رەسەي اۋماعىنداعى بۇكىل جۇمىس ۇدەرىسى باقىلانادى”، – دەلىنگەن كونسورسيۋم تاراتقان رەسمي حابارلامادا.
ابىروي بولعاندا، وقيعا سالدارىنان زارداپ شەككەندەر جوق.
“قالا بويىنشا “درون ءقاۋپى” دابىلى جاريالانعان بويدا قىزمەتكەرلەر دەرەۋ ءقاۋىپسىز ورىندارعا ەۆاكۋاسيالاندى. ايلاقتاعى جۇك وپەراسيالارى ۋاقىتشا توقتاتىلدى. كراسنودار ولكەسىنىڭ گۋبەرناتورى ۆەنيامين كوندراتيەۆ تۇنگى شابۋىلدى سوڭعى ۋاقىتتاعى ەڭ ۇزاق ءارى ەڭ جاپپاي جاسالعان شابۋىلداردىڭ ءبىرى دەپ سيپاتتادى: جاراقات العاندار بار، تۇرعىن ۇيلەر بۇلىنگەن”، – دەپ تولىقتىردى كقك.
كونسورسيۋم 2025 جىلدىڭ 24 قىركۇيەگىندە نوۆورەسەيدەگى كقك تەڭىز تەرمينالىنىڭ قالالىق كەڭسەسى دە درون سوققىسىنا ۇشىراعانىن ەسكە سالدى.
“2025 جىلدىڭ 17 اقپانىندا كاسپيي قۇبىر كونسورسيۋمىنىڭ ەڭ ءىرى نىساندارىنىڭ ءبىرى – “كروپوتكين” مۇناي ايداۋ ستانسياسىنا بىردەن جەتى درونمەن شابۋىل جاسالدى. شابۋىل ۋاقىتتىق ارالىقپەن جاسالىپ، نىساننىڭ جۇمىسىن بۇزۋدى عانا ەمەس، ستانسيادا كەزەكشىلىك ەتىپ جۇرگەن قىزمەتكەرلەر اراسىندا ادام شىعىنىنا اكەلۋدى ماقسات ەتكەن. قالپىنا كەلتىرۋ جۇمىستارىنىڭ كەشەنىنەن كەيىن “كروپوتكين” ستانسياسى 2025 جىلدىڭ مامىر ايىندا قايتا ىسكە قوسىلدى”، – دەلىنگەن حابارلامادا.
