كومپانيا 13 قاڭتاردا تاسىمالداۋ 2023 جىلدىڭ العاشقى ءۇش ايىندا جۇزەگە اسىرىلاتىنىن ايتتى.
"قازترانسويل" اق رەسەي فەدەراسياسى ەنەرگەتيكا مينيسترلىگىنەن 2023-جىلدىڭ I توقسانىندا "ترانسنەفت" ماگيسترالدى مۇناي قۇبىرى جۇيەسى ارقىلى "اداموۆا زاستاۆا" مۇناي بەكەتىمەن ءارى قاراي گەرمانياعا 300 مىڭ توننا كولەمدە قازاقستاندىق مۇناي جەتكىزۋ بويىنشا راستاۋ قاعازىن قابىلدادى" دەپ جازىلعان كومپانيا حابارلاماسىندا.
كومپانيانىڭ ايتۋىنشا، بۇل رەسەي ەنەرگەتيكا مينيسترلىگى بەكىتكەن تمد ەلدەرىنىڭ مۇنايىن رەسەي ارقىلى تاسىمالداۋ تۋرالى مۇناي ءترانزيتىنىڭ كەستەسىندە جازىلعان.
"مۇنايدىڭ اتالمىش ءترانزيتى قازاقستان ۇكىمەتى مەن رەسەي ۇكىمەتى اراسىندا 2002 جىلدىڭ 7 ماۋسىمدا جاسالعان ارنايى كەلىسىمشارت نەگىزىندە ىسكە اسادى" دەيدى كومپانيا وكىلدەرى.
11 قاڭتاردا قازاقستان ەنەرگەتيكا ءمينيسترى بولات اقشولاقوۆ قازاقستاننىڭ العاشقى 20 مىڭ توننا مۇنايدى "دوستىق" قۇبىرى ارقىلى گەرمانياعا تاسىمالداۋعا دايىن ەكەنىن، ءبىراق رەسەي جاعىنىڭ كەلىسىمىن كۇتىپ وتىرعانىن حابارلاعان.
اقپاراتقا قاراعاندا، قازاقستان 2023 جىلى گەرمانياعا 1،5 ملن توننا مۇنايدى ەكسپورتتاۋدى جوسپارلاپ وتىر.
قاجەت جاعدايدا تاسىمالداۋ كولەمىن 6-6،5 ملن تونناعا دەيىن جەتكىزە الادى. دەگەنمەن ءمينيستردىڭ ايتۋىنشا، قازاقستان جىلىنا التى ميلليون تونناعا دەيىن مۇناي تاسىمالداي العانمەن گەرمانيانىڭ سۇرانىسى ودان دا جوعارى.
2023 جىلى قازاقستان 90،5 ملن توننا مۇناي ءوندىرۋدى جوسپارلاپ وتىر، 71 ميلليونى ەكسپورتقا كەتەدى.
