بۇل – قازاقستان بيلىگىنىڭ اۋعانستاندا بيلىككە كەلگەن "تاليبانمەن" العاشقى رەسمي كەزدەسۋى. نۇر-سۇلتان بۇل توپتى 2005 جىلى "تەرروريستىك ۇيىم" دەپ تانىعان. ءبىراق مينيسترلىك تاراتقان باسپا ءسوز حابارلاماسىندا "تاليبان" ۇيىمىنىڭ اتى اتالمايدى، ال ءامىر حان مۋتتاكي "اۋعانستان ۋاقىتشا ۇكىمەتىندەگى سىرتقى ىستەر ءمينيسترىنىڭ مىندەتىن اتقارۋشى" دەپ كورسەتىلگەن.
مينيسترلىكتىڭ حابارلاۋىنشا، كەزدەسۋدە "اۋعان حالقىنا ازىق-تۇلىك پەن باسقا دا گۋمانيتارلىق كومەك كورسەتۋ ماسەلەلەرى" تالقىلانعان.
– اۋعانستاننىڭ سىرتقى ساياسي ۆەدومستۆاسىنىڭ باسشىسى قازاقستان تاراپىنا وتپەلى قيىن كەزەڭدە اۋعان حالقىنا ەلەۋلى قولداۋ كورسەتۋگە ازىرلىك بىلدىرگەنى ءۇشىن العىسىن ايتتى، – دەيدى ءسىم. – [اۋعانستانداعى جاڭا بيلىكتىڭ] قازاقستان سىرتقى ساياساتىنا، سونىڭ ىشىندەگى اۋعان باعىتىنداعى ۇستانىمىنا قۇرمەتپەن قارايتىنى اتاپ ءوتىلدى.
ازاتتىق كەزدەسۋدىڭ انىق-قانىعىن ءبىلۋ ءۇشىن سىرتقى ىستەر مينيسترلىگىنە جۇگىندى، ءبىراق مينيسترلىكتىڭ رەسمي وكىلى ايبەك سمادياروۆ رەسمي حابارلاماعا الىپ-قوسارى جوعىن ايتتى.
Vlast.kz "تاليبان" وكىلىنىڭ Twitter جەلىسىندەگى جازباسىنا سىلتەي وتىرىپ، كەزدەسۋدە ەكى ەل اراسىنداعى ساۋدا قاتىناسى دا تالقىلاندى دەپ جازدى. بۇۇ ستاتيستيكا اگەنتتىگىنىڭ مالىمەتىنشە، 2019 جىلى قازاقستان اۋعانستانعا قۇنى 400 ميلليون دوللارعا جۋىق تاۋار ەكسپورتتاعان.
بيىل مامىردا اۋعانستاندا 20 جىل بولعان باتىس اسكەرلەرى ەلدەن كەتە باستاپ، 1996-2001 جىلى ەلدە بيلىك قۇرعان "تاليبان" ەلدەگى اۋداندار مەن قالالاردى قايتا باقىلاۋىنا الا باستادى. 15 تامىز كۇنى ولار كابۋلعا كىرىپ، بۇكىل اۋعانستاندى ءوز قولىنا العانىن مالىمدەدى.
تالىپتەر ەسكى ادەتىنە سالىپ، رەپرەسسيالىق زاڭدارىن قايتا ەنگىزەدى دەپ قورىققان اۋعاندار ەلدەن كەتۋگە اسىعىپ، اۋىر كۇيگە دۋشار بولدى. ولاردىڭ اراسىندا ءوزىنىڭ قازاق ەكەنىن ايتىپ، قازاقستاننان كومەك سۇراعان ازاماتتار دا بار. 10 قىركۇيەك كۇنى قازاقستان 35 اۋعان قازاعىن اتامەكەنگە جەتكىزدى. ءبىراق اۋعانستاندا ءالى دە جۇزدەگەن اۋعان قازاعى قالىپ قويعان.
ورتالىق ازيا ەلدەرى اراسىندا وسىعان دەيىن قىرعىزستان مەن وزبەكستان وكىلدەرى "تاليبان" ۇكىمەتىمەن بايلانىس ورناتىپ ۇلگەرگەن. تەك تاجىكستان عانا تالىپتەر بيلىگىن مويىنداماي وتىر.
تالىپتەر بۇرىنعى ءتارتىپتى ورناتپايتىنىن، ادام قۇقىعىنا ءمان بەرەتىنىن ايتىپ وتىر. ءبىراق ولاردىڭ سوزىنە كۇمان كەلتىرەتىندەر كوپ. 25 قىركۇيەك كۇنى اۋعانستاننىڭ سولتۇستىك باتىسىنداعى گەرات قالاسىندا تالىپتەردىڭ ءتورت ادامنىڭ ءمايىتىن ءىلىپ قويعانى حابارلاندى. وعان دەيىن "تاليباننىڭ" كىسى ولتىرگەندەر مەن ەسىرتكى تاسىمالداعانداردى تۇرمەدەن بوساتقانى ءمالىم بولعان.
23 قىركۇيەك كۇنى Associated Press اگەنتتىگى "تاليباننىڭ" نەگىزىن قالاۋشىلاردىڭ ءبىرى موللا نۋريددين تۋرابيدەن العان سۇحباتى جارىق كوردى. وندا تۋرابي "تاليباننىڭ" قىلمىسكەردىڭ اياق-قولىن شاۋىپ تاستاۋ، ءولىم جازاسىنا كەسۋ تاجىريبەسىن قالپىنا كەلتىرۋدى ويلاپ وتىرعانىن ايتقان.
