Qazaqstan elshisi "Taliban" ókilimen resmi kezdesti
Bul – Qazaqstan biliginiń Aýǵanstanda bilikke kelgen "Talibanmen" alǵashqy resmi kezdesýi. Nur-Sultan bul topty 2005 jyly "terroristik uiym" dep tanyǵan. Biraq ministrlik taratqan baspasóz habarlamasynda "Taliban" uiymynyń aty atalmaidy, al Ámir Han Mýttaki "Aýǵanstan ýaqytsha úkimetindegi syrtqy ister ministriniń mindetin atqarýshy" dep kórsetilgen.
Ministrliktiń habarlaýynsha, kezdesýde "aýǵan halqyna azyq-túlik pen basqa da gýmanitarlyq kómek kórsetý máseleleri" talqylanǵan.
– Aýǵanstannyń syrtqy saiasi vedomstvasynyń basshysy Qazaqstan tarapyna ótpeli qiyn kezeńde aýǵan halqyna eleýli qoldaý kórsetýge ázirlik bildirgeni úshin alǵysyn aitty, – deidi SIM. – [Aýǵanstandaǵy jańa biliktiń] Qazaqstan syrtqy saiasatyna, sonyń ishindegi aýǵan baǵytyndaǵy ustanymyna qurmetpen qaraityny atap ótildi.
Azattyq kezdesýdiń anyq-qanyǵyn bilý úshin syrtqy ister ministrligine júgindi, biraq ministrliktiń resmi ókili Aibek Smadiiarov resmi habarlamaǵa alyp-qosary joǵyn aitty.
Vlast.kz "Taliban" ókiliniń Twitter jelisindegi jazbasyna siltei otyryp, kezdesýde eki el arasyndaǵy saýda qatynasy da talqylandy dep jazdy. BUU statistika agenttiginiń málimetinshe, 2019 jyly Qazaqstan Aýǵanstanǵa quny 400 million dollarǵa jýyq taýar eksporttaǵan.
Biyl mamyrda Aýǵanstanda 20 jyl bolǵan Batys áskerleri elden kete bastap, 1996-2001 jyly elde bilik qurǵan "Taliban" eldegi aýdandar men qalalardy qaita baqylaýyna ala bastady. 15 tamyz kúni olar Kabýlǵa kirip, búkil Aýǵanstandy óz qolyna alǵanyn málimdedi.
Tálipter eski ádetine salyp, repressiialyq zańdaryn qaita engizedi dep qoryqqan aýǵandar elden ketýge asyǵyp, aýyr kúige dýshar boldy. Olardyń arasynda óziniń qazaq ekenin aityp, Qazaqstannan kómek suraǵan azamattar da bar. 10 qyrkúiek kúni Qazaqstan 35 aýǵan qazaǵyn atamekenge jetkizdi. Biraq Aýǵanstanda áli de júzdegen aýǵan qazaǵy qalyp qoiǵan.
Ortalyq Aziia elderi arasynda osyǵan deiin Qyrǵyzstan men Ózbekstan ókilderi "Taliban" úkimetimen bailanys ornatyp úlgergen. Tek Tájikstan ǵana tálipter biligin moiyndamai otyr.
Tálipter burynǵy tártipti ornatpaitynyn, adam quqyǵyna mán beretinin aityp otyr. Biraq olardyń sózine kúmán keltiretinder kóp. 25 qyrkúiek kúni Aýǵanstannyń soltústik batysyndaǵy Gerat qalasynda tálipterdiń tórt adamnyń máiitin ilip qoiǵany habarlandy. Oǵan deiin "Talibannyń" kisi óltirgender men esirtki tasymaldaǵandardy túrmeden bosatqany málim bolǵan.
23 qyrkúiek kúni Associated Press agenttigi "Talibannyń" negizin qalaýshylardyń biri molla Nýriddin Týrabiden alǵan suhbaty jaryq kórdi. Onda Týrabi "Talibannyń" qylmyskerdiń aiaq-qolyn shaýyp tastaý, ólim jazasyna kesý tájiribesin qalpyna keltirýdi oilap otyrǵanyn aitqan.
