قازاقستان اۋىل شارۋاشىلىعى القاپتارىنىڭ كولەمى بويىنشا الەم ەلدەرى اراسىندا التىنشى ورىندا تۇر. بۇل كورسەتكىشتەر بۇۇ-نىڭ ازىق-تۇلىك جانە اۋىل شارۋاشىلىعى ۇيىمىنىڭ دەرەكتەرى نەگىزىندە جاسالعان، دەپ حابارلايدى Dalanews.kz.

رەيتينگتە العاشقى ورىنداردى جۇڭگو، اقش جانە اۆستراليا يەلەنەدى. ودان كەيىن برازيليا مەن رەسەي كەلەدى. قازاقستان 2،14 ملن شارشى شاقىرىم كورسەتكىشپەن التىنشى ورىنعا جايعاسقان. ۇزدىك جەتىلىكتى ءۇندىستان تۇيىندەيدى.

ءار مەملەكەت اۋىل شارۋاشىلىعىندا بەلگىلى ءبىر باعىتقا ماماندانعان. ماسەلەن، اقش – جۇگەرى ءوندىرىسى بويىنشا الەمدىك كوشباسشى، برازيليا – سويا مەن قانت قامىسىن وندىرۋدە الدا، ال اۆستراليا بيداي مەن ءداندى داقىلداردى كوپ كولەمدە وندىرەدى.

قازاقستاندا سوڭعى جىلدارى ەگىس قۇرىلىمى وزگەرىپ كەلەدى. ەلدە بيداي القاپتارى قىسقارتىلىپ، تابىسى جوعارى داقىلداردىڭ ۇلەسى ارتتىرىلۋدا.

بيىل ەلىمىزدەگى جالپى ەگىس القابى 23،8 ملن گەكتار. بۇل وتكەن جىلمەن سالىستىرعاندا 180 مىڭ گەكتارعا ارتىق.

اۋىل شارۋاشىلىعى ءمينيسترى ايداربەك ساپاروۆتىڭ ايتۋىنشا، باسىمدىق جوعارى رەنتابەلدى داقىلدارعا بەرىلگەن. اتاپ ايتقاندا، مايلى داقىلدار القابى 55 مىڭ گەكتارعا، مال ازىقتىق داقىلدار 242 مىڭ گەكتارعا، ارپا 94 مىڭ گەكتارعا، ال ۇيىمداسقان شارۋاشىلىقتارداعى كارتوپ القابى 10،3 مىڭ گەكتارعا ۇلعايادى. ال بيداي القابى 125 مىڭ گەكتارعا قىسقارىپ، 12،1 ملن گەكتار.