قازاقستان اقش-تىڭ Joby Aero كومپانياسىمەن جالپى قۇنى 300 ميلليون دوللار بولاتىن eVTOL ەلەكترلى اۋە كولىكتەرىن ساتىپ الۋ تۋرالى مەموراندۋمعا قول قويدى. بۇل تۋرالى جاساندى ينتەللەكت جانە سيفرلىق دامۋ مينيسترلىگى مالىمدەدى، دەپ حابارلايدى Dalanews.kz.

تىك ۇشىپ-قونا الاتىن بۇل ۇشۋ اپپاراتتارى قالالىق اۋە موبيلدىگى جوباسىنىڭ ءبىر بولىگىنە اينالماق. الماتى مەن الاتاۋ قالالارىنىڭ كولىك جۇيەسىنە اەروتاكسي قىزمەتىن ەنگىزۋ جانە سىناق الاڭىن قۇرۋ جوسپارلانىپ وتىر.

مينيستر جاسلان مادييەۆتىڭ ايتۋىنشا، بۇل باستاما “اقىلدى قالالار” تۇجىرىمداماسىن دامىتۋ جولىنداعى ماڭىزدى قادام.

ايتا كەتەيىك، بۇعان دەيىن قازاقستان باسشىسى توقايەۆ اقش پرەزيدەنتى ترامپپەن 17 ميلليارد دوللارعا كەلىسسوز جۇرگىزگەنىن حابارلاعان ەدىك.

اق ۇيدەگى كەزدەسۋدە مەملەكەت باسشىسى ۆاشينگتونعا ساپارمەن كەلۋگە شاقىرعانى جانە قازاقستاندىق دەلەگاسياعا كورسەتكەن قوناقجاي كوڭىلى ءۇشىن اقش پرەزيدەنتىنە ريزاشىلىق ءبىلدىردى.

قاسىم-جومارت توقايەۆ دونالد ترامپتىڭ پرەزيدەنتتىك لاۋازىمىنىڭ تاريحي سيپاتىنا توقتالىپ، ونىڭ باسشىلىعىمەن اقش الەمنىڭ جەتەكشى ەكونوميكالىق، ساياسي جانە تەحنولوگيالىق دەرجاۆاسى رەتىندەگى پوزيسياسىن كۇشەيتىپ كەلە جاتقانىن اتاپ ءوتتى.

قازاقستان پرەزيدەنتىنىڭ ايتۋىنشا، امەريكا كوشباسشىسى جەر ءجۇزىنىڭ قاۋىپسىزدىگىن، تۇراقتىلىعى مەن وركەندەۋىن قامتاماسىز ەتۋدە شەشۋشى ءرول اتقارادى.

مەملەكەت باسشىسى قازاقستان اقش پرەزيدەنتىنىڭ بىتىمگەرلىك باستامالارىن تولىق قولدايتىنىن جەتكىزدى. سونىڭ ىشىندە كەلەشەكتە ورتا ءدالىزدى ودان ءارى دامىتۋعا ىقپال ەتەتىن «ترامپتىڭ حالىقارالىق بەيبىتشىلىك جانە وركەندەۋ جولىنا» (TRIPP) ەرەكشە نازار اۋداردى.

دونالد ترامپ اقش-تىڭ قازاقستانمەن كوپجوسپارلى كەڭەيتىلگەن ستراتەگيالىق سەرىكتەستىكتى دامىتۋعا نيەتتى ەكەنىن راستادى.

ساپار اياسىندا قازاقستان مەن قۇراما شتاتتارى اراسىندا جالپى سوماسى 17 ميلليارد دوللاردان اساتىن كوممەرسيالىق كەلىسىمدەرگە قول قويىلدى.