كوكشەتاۋدا ۇلتارالىق ارازدىقتى قوزدىرۋ دەرەگى بويىنشا قىلمىستىق ءىس تەرگەلىپ جاتىر. بۇل تۋرالى قىلمىستىق كودەكستىڭ 174-بابى 1-بولىگى "الەۋمەتتىك، ۇلتتىق، رۋلىق، ناسىلدىك، تەكتىك نەمەسە ءدىني الاۋىزدىقتى قوزدىرۋ" بابى اياسىندا ءىس قوزعالعانى بەلگىلى بولدى، دەپ حابارلايدى Dalanews.kz.

Salem.alem. media دەرەگىنشە، داۋدىڭ تۋىنداۋىنا قالاداعى سۇلۋلىق سالوندارىنىڭ بىرىندە جۇمىس ىستەيتىن قىزمەتكەرلەر اراسىنداعى جانجال سەبەپ بولعان.

وقيعا بىلتىر وربىگەن. شاشتاراز الماگۇل الييەۆانىڭ ايتۋىنشا، سالون ىشىندە ورتاق تىڭدايتىن مۋزىكاعا بايلانىستى قىزمەتكەرلەر اراسىندا كەلىسپەۋشىلىك تۋعان.

ونىڭ سوزىنشە، سالوندا بۇعان دەيىن ورىس، تۇرىك جانە گرۋزين تىلدەرىندەگى اندەر ەش كەدەرگىسىز قويىلىپ كەلگەن. الايدا ءوزى قازاقشا ءان قوسۋدى ۇسىنعاندا، ارىپتەسى بۇعان قارسى شىققان.

الماگۇل الييەۆانىڭ ايتۋىنشا، ول مۋزىكا پۋلتىنە بارىپ قازاقشا ءان قوسقان كەزدە ارىپتەسى: "جوق، قويما، ءبىز وندايدى تىڭدامايمىز"، - دەپ ايتقان. سوعان قاراماستان ول ءاندى قوسىپ، جۇمىسىن جالعاستىرا بەرگەن.

ءبىراز ۋاقىتتان كەيىن كليەنتتەرى كەتىپ قالعان سوڭ، نە سەبەپتى مۋزىكا وشىرىلگەنىن سۇراعان. سول كەزدە ارىپتەسى: "مەن ساعان ايتتىم عوي - ءبىز وندايدى تىڭدامايمىز. مۇندايدى كىم تىڭدايدى؟" دەگەن مازمۇندا جاۋاپ بەرگەنىن ايتادى.

ەكى قىزمەتكەر اراسىنداعى سوزگە كەلۋ ۇزاققا سوزىلماعانىمەن، وقيعا كەيىن جالعاسىن تاپقان. الماگۇل الييەۆا بۇل جاعدايعا بايلانىستى پوليسياعا ارىز تۇسىرگەن.

الەۋمەتتىك جەلىدە جاريالانعان ۆيدەولاردىڭ استىنداعى پىكىرلەردە اۆتور جانجالدان كەيىن قازاقشا مۋزىكاعا قارسى بولعان قىزمەتكەر زاتتارىن جيناپ، سالوننان جۇمىستان كەتكەنىن دە جازعان.

ءقازىر اتالعان دەرەك بويىنشا قۇقىق قورعاۋ ورگاندارى تەرگەۋ جۇرگىزىپ جاتىر. وقيعانىڭ ءمان-جايى انىقتالۋدا.