ۇلىتاۋ وڭىرىندەگى تج ورنىندا ۇكىمەتتىك كوميسسيا جۇمىس ىستەپ جاتىر، دەپ حابارلايدى Dalanews.kz.
پرەمەر-مينيستر ولجاس بەكتەنوۆتىڭ تاپسىرماسى بويىنشا ۇلىتاۋ وبلىسىنداعى تج ورنىندا ۆيسە-پرەمەر قانات بوزىمبايەۆتىڭ باسشىلىعىمەن ۇكىمەتتىك كوميسسيا جۇمىس ىستەپ جاتىر.
كوميسسيا قۇرامىندا ۇلىتاۋ وبلىسىنىڭ اكىمى داستان رىسپەكوۆ، تج ءمينيسترى شىڭعىس ءارىنوۆ، ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ، ەڭبەك جانە حالىقتى الەۋمەتتىك قورعاۋ ءبىرىنشى ۆيسە-مينيسترى ءاقمادي سارباسوۆ، دەنساۋلىق ساقتاۋ ۆيسە-مينيسترى ەرجان نۇرلىبايەۆ، ونەركاسىپ جانە قۇرىلىس ۆيسە-مينيسترى يران شارحان، ق ر تجم ونەركاسىپتىك قاۋىپسىزدىك كوميتەتى ءتوراعاسىنىڭ مىندەتىن اتقارۋشى راشيد دۋبايەۆ بار.
وقيعا ورنىندا تج قىزمەتى، ءىىم جانە ونەركاسىپتىك قاۋىپسىزدىك كوميتەتىنىڭ شۇعىل تەرگەۋ توبى، سونداي-اق ەڭبەك جانە حالىقتى الەۋمەتتىك قورعاۋ مينيسترلىگى مەن ونەركاسىپ جانە قۇرىلىس مينيسترلىگىنىڭ قىزمەتكەرلەرى جۇمىس ىستەپ جاتىر.
كوميسسيا مۇشەلەرى وقيعا ورنىندا بولىپ، تەرگەۋ بارىسىمەن تانىستى. قازا تاپقانداردىڭ وتباسىلارىنا ءبىرىنشى كەزەكتە كومەك كورسەتۋ جونىندە تاپسىرما بەرىلدى.
ءارى قاراي پرەمەر-مينيستردىڭ ورىنباسارى شتاب وتىرىسىن وتكىزىپ، قازا تاپقانداردىڭ تۋىستارىمەن كەزدەسەدى.
ەسكە سالايىق، بۇعان دەيىن ۇلىتاۋ وبلىسىندا شاحتا وپىرىلىپ، جەتى قىزمەتكەر قازا تاپقانىن حابارلاعان ەدىك.
جاڭاارقا اۋدانىنداعى "قازاقمىس" كورپوراسياسىنا قاراستى "جومارت" كەنىشىندەگى شاحتادا تاۋ-كەن ماسساسى وپىرىلدى. بۇگىن قۇتقارۋشىلار جەتى جۇمىسشىنىڭ دەنەسىن تاپتى.
كابەلدەر ۇزىلۋىنە بايلانىستى جۇمىسشىلارمەن بايلانىس تا ءۇزىلدى. اۆاريالىق-قۇتقارۋ جۇمىستارىنا ۇلىتاۋ جانە قاراعاندى وبلىستارىنىڭ تجد كۇشتەرى مەن قۇرالدارى، اپاتتار مەديسيناسى ورتالىعىنىڭ قىزمەتكەرلەرى جانە تجم پسيحولوگتارى جۇمىلدىرىلدى.
پرەمەر-مينيستر ولجاس بەكتەنوۆتىڭ تاپسىرماسى بويىنشا ۇلىتاۋ وبلىسى جاڭاارقا اۋدانىنداعى شاحتاداعى جاعدايدىڭ سەبەپتەرىن تەرگەۋ جانە زارداپ شەككەندەرگە كومەكتەسۋ جونىندەگى ارنايى كوميسسيا قۇرىلدى. كوميسسيانى پرەمەر-مينيستردىڭ ورىنباسارى قانات بوزىمبايەۆ باسقاردى.
بۇل دەرەككە قاتىستى پوليسيا دەپارتامەنتى مالىمدەمە جاسادى.
اتالعان فاكتى بويىنشا ق ر قك-نىڭ 277-بابىنىڭ 3-بولىگى «تاۋ-كەن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ» بويىنشا ءىس قوزعالدى. وقيعا ورنىندا ۇلىتاۋ وبلىسىنىڭ پوليسيا دەپارتامەنتىنىڭ جەدەل-تەرگەۋ توپتارى جۇمىس ىستەپ جاتىر. قازىرگى ۋاقىتتا بارلىق قاجەتتى تەرگەۋ امالدارى جۇرگىزىلىپ جاتىر.
"جومارت" كەنىشى - جەزقازعان قالاسىنان وڭتۇستىك-شىعىسقا قاراي 130 شاقىرىم جەردە ورنالاسقان. وندا مىس ءسۋلفيدى وندىرىلەدى. "قازاقمىس" كورپوراسياسىنىڭ ءىرى اكسيونەرى - Kazakhmys Copper.
