Ulytaý óńirindegi TJ ornynda úkimettik komissiia jumys istep jatyr, dep habarlaidy Dalanews.kz.
Premer-ministr Oljas Bektenovtiń tapsyrmasy boiynsha Ulytaý oblysyndaǵy TJ ornynda vitse-premer Qanat Bozymbaevtyń basshylyǵymen úkimettik komissiia jumys istep jatyr.
Komissiia quramynda Ulytaý oblysynyń ákimi Dastan Ryspekov, TJ ministri Shyńǵys Árinov, ishki ister ministriniń birinshi orynbasary Baýyrjan Álenov, eńbek jáne halyqty áleýmettik qorǵaý birinshi vitse-ministri Aqmádi Sarbasov, densaýlyq saqtaý vitse-ministri Erjan Nurlybaev, ónerkásip jáne qurylys vitse-ministri Iran Sharhan, QR TJM Ónerkásiptik qaýipsizdik komiteti tóraǵasynyń mindetin atqarýshy Rashid Dýbaev bar.
Oqiǵa ornynda TJ qyzmeti, IIM jáne Ónerkásiptik qaýipsizdik komitetiniń shuǵyl tergeý toby, sondai-aq Eńbek jáne halyqty áleýmettik qorǵaý ministrligi men Ónerkásip jáne qurylys ministrliginiń qyzmetkerleri jumys istep jatyr.
Komissiia músheleri oqiǵa ornynda bolyp, tergeý barysymen tanysty. Qaza tapqandardyń otbasylaryna birinshi kezekte kómek kórsetý jóninde tapsyrma berildi.
Ári qarai Premer-ministrdiń orynbasary Shtab otyrysyn ótkizip, qaza tapqandardyń týystarymen kezdesedi.
Eske salaiyq, buǵan deiin Ulytaý oblysynda shahta opyrylyp, jeti qyzmetker qaza tapqanyn habarlaǵan edik.
Jańaarqa aýdanyndaǵy "Qazaqmys" korporatsiiasyna qarasty "Jomart" kenishindegi shahtada taý-ken massasy opyryldy. Búgin qutqarýshylar jeti jumysshynyń denesin tapty.
Kabelder úzilýine bailanysty jumysshylarmen bailanys ta úzildi. Avariialyq-qutqarý jumystaryna Ulytaý jáne Qaraǵandy oblystarynyń TJD kúshteri men quraldary, apattar meditsinasy ortalyǵynyń qyzmetkerleri jáne TJM psihologtary jumyldyryldy.
Premer-ministr Oljas Bektenovtiń tapsyrmasy boiynsha Ulytaý oblysy Jańaarqa aýdanyndaǵy shahtadaǵy jaǵdaidyń sebepterin tergeý jáne zardap shekkenderge kómektesý jónindegi arnaiy komissiia quryldy. Komissiiany premer-ministrdiń orynbasary Qanat Bozymbaev basqardy.
Bul derekke qatysty Politsiia departamenti málimdeme jasady.
Atalǵan fakti boiynsha QR QK-niń 277-babynyń 3-bóligi «Taý-ken nemese qurylys jumystaryn júrgizý kezinde qaýipsizdik erejelerin buzý» boiynsha is qozǵaldy. Oqiǵa ornynda Ulytaý oblysynyń politsiia departamentiniń jedel-tergeý toptary jumys istep jatyr. Qazirgi ýaqytta barlyq qajetti tergeý amaldary júrgizilip jatyr.
"Jomart" kenishi - Jezqazǵan qalasynan ońtústik-shyǵysqa qarai 130 shaqyrym jerde ornalasqan. Onda mys sýlfidi óndiriledi. "Qazaqmys" korporatsiiasynyń iri aktsioneri - Kazakhmys Copper.
