قازاقستان رەسپۋبليكاسىنىڭ مادەنيەت جانە اقپارات مينيسترلىگى ۇلتتىق «قازاقفيلم» كينوستۋدياسىنىڭ بارلىق نەگىزگى وندىرىستىك نىساندارى مەملەكەت مەنشىگىندە قالاتىنىن رەسمي تۇردە مالىمدەدى، دەپ حابارلايدى Dalanews.kz
مينيسترلىكتىڭ مالىمەتىنشە، بۇل شەشىم رىسقۇلوۆ داڭعىلىنداعى «پ» ءارپى تۇرىندە جوبالانعان ايگىلى عيماراتقا دا قاتىستى. قازىرگى تاڭدا نىسان «ءقازاقفيلمنىڭ» مەنشىگىندە جانە ونى ساتۋ جونىندە ەشقانداي رەسمي دەرەك جوق.
ۆەدومستۆو سوڭعى ۋاقىتتا الەۋمەتتىك جەلىلەردە، سونىڭ ىشىندە مادەنيەتتانۋشى ەرلان تولەۋتايدىڭ جازبالارىندا دا شىندىققا جاناسپايتىن جانە راستالماعان اقپاراتتار تاراپ جاتقانىن اتاپ ءوتتى. مۇنداي اقپارات قوعامدا مەملەكەتتىك ورگاندارعا دەگەن سەنىمسىزدىك تۋعىزۋى مۇمكىن.
مادەنيەت جانە اقپارات مينيسترلىگى ازاماتتاردى تەك رەسمي اقپارات كوزدەرىنە سەنۋگە شاقىرىپ، جالعان مالىمەت تاراتۋدىڭ زاڭ الدىندا جاۋاپكەرشىلىككە اكەلەتىنىن ەسكەرتتى. ق ر قىلمىستىق كودەكسىنىڭ 274-بابىنا سايكەس، جالعان اقپارات تاراتۋ قاتاڭ جازالانادى.
