قازاق ۇيدە جارتىلاي جالاڭاش بيلەپ، جۇرتتىڭ اشۋىنا تيگەن حورەوگراف اليشەر سۇلتانبەك ۇلىنىڭ ىسىنە قاتىستى ساراپتامانىڭ العاشقى ناتيجەسى شىقتى، - دەپ حابارلايدى Dalanews.kz.
باس پروكۋراتۋرا اليشەر سۇلتانبەك ۇلىنىڭ ىسىنە قاتىستى سوتقا دەيىنگى تەرگەۋ جۇرگىزگەن بولاتىن.
قازاق ۇيدە high heels ستيلىندە (بيىك وكشەلى اياق كيىممەن بيلەۋ) بيلەگەن سۇلتانبەكۇلىنا ءماجىلىس دەپۋتاتتارى شاعىمدانىپ، باس پروكۋراتۋراعا سۇراۋ حات جازعان بولاتىن. دەپۋتاتتار ءبيشىنىڭ ونەرىنە زاڭ تۇرعىسىنان باعا بەرۋدى سۇرادى.
حالىق قالاۋلىلارى بۇل -"قازاقتىڭ ۇلتتىق كيىمى مەن مادەنيەتىن قورلاۋ" دەپ مالىمدەدى. بيىل شىلدەدە باس پروكۋراتۋرا دەپۋتاتتاردىڭ نارازىلىعىنا جاۋاپ بەرىپ، سۇلتانبەكوۆكە قاتىستى سوتقا دەيىنگى تەرگەۋ باستالعانىن حابارلادى.
حورەوگراف قىلمىستىق كودەكستىڭ 174-بابى (الەۋمەتتiك، ۇلتتىق، رۋلىق، ءناسiلدiك، تەكتىك-توپتىق نەمەسە دiني الاۋىزدىقتى قوزدىرۋ) بويىنشا ايىپتالۋى مۇمكىن. ەگەر ونىڭ كىناسى دالەلدەنسە اليشەر سۇلتانبەكوۆ جەتى جىلعا باس بوستاندىعىنان ايىرىلۋى مۇمكىن.
قازىرگى تاڭدا، "كۋرسيۆ" مالىمەتتەرى بويىنشا، بۇل ىسكە قاتىستى ساراپتاما جاسالعان. العاشقى مەملەكەتتىك ساراپتاما ناتيجەسى بويىنشا، قازاق ۇيدەگى بيدە قىلمىس قۇرامى جوق.
"قازىرگى تاڭدا قوسىمشا ساراپتامانىڭ ناتيجەسىن كۇتىپ وتىرمىز. ءبىرىنشى ساراپتاما ناتيجەسى بويىنشا - قىلمىس قۇرامى جوق"، - دەيدى ءبيشى "كۋرسيۆكە".
ءقازاقتىلدى اۋديتوريا سۇلتانبەك ۇلىنىڭ ارەكەتىن «كيەلىگە قول سۇعۋ» رەتىندە باعالادى. قازاق حالقى ءۇشىن كيىز ءۇي — قاراپايىم قۇرىلىستان الدەقايدا ۇلكەن ماعىناعا يە، ول عاسىرلار بويى قالىپتاسقان ۇلتتىق مادەنيەتىمىزدىڭ سيمۆولى جانە رۋحاني مۇرا. قازاقتاردىڭ مادەنيەتى سىرتقى الەمنىڭ اسەرىنەن وزگەرىسكە ۇشىراعان كەزەڭدەردە، كيىز ءۇي سەكىلدى ۇلتتىق نىساندار ءوزىنىڭ ءمان-ماعىناسىن ساقتاپ قالدى. بي اۆتورلارىنىڭ ارەكەتى قازاق حالقىنىڭ رۋحاني قۇندىلىقتارىنا قارسى شىعۋ رەتىندە باعالاندى.
"سۇلتانبەك ۇلى مەن ونىڭ جاقتاستارى بۇل ءبيدى «ءجاي عانا وزىندىك كورىنىس» دەپ تۇسىندىرگەنىمەن، مادەنيەت پەن ءسالت-داستۇر تەك ەستەتيكا عانا ەمەس، ۇلتتىق سانا مەن بولمىستىڭ ماڭىزدى ءبىر بولىگى ەكەنىن ەستەن شىعارۋعا بولمايدى"، - دەيدى ءقازاقتىلدى قاۋىم.
