باسى داۋعا قالعان Qazaq Coffee كوفەحاناسى جۇمىسىن توقتاتتى، دەپ حابارلايدى Dalanews.kz Qaz365.kz-كە سىلتەپ.
قوعامنىڭ سىنىنا ۇشىراعان Qazaq Coffee كوفەحاناسى جابىلىپ، ول جالعا بەرىلەتىن بولعان ەكەن. بۇرىن كوفەحانا ورنالاسقان جەردىڭ يەسى بيزنەستىڭ جابىلعانىن، كەڭسە بوس ەكەنىن جانە جالعا الۋشى ىزدەپ جاتقانىن حابارلادى.
«بيزنەس جابىلدى، كەڭسە بوس، مەن جالعا الۋشىسىز قالدىم. دوستار، مەن بۇل كەڭسەنىڭ يەسىمىن، سىزدەر Qazaq Coffee يەسىمەن شاتاستىرماڭىزدار. كەشەدەن بەرى قايتادان وزىمە الدىم، سوندىقتان ول جالعا بەرىلەدى. بۇل جەردىڭ اۋدانى – 47-48 شارشى مەتر. ەگەر قىزىقتىرسا، مەنىڭ جەكەمە شىعىڭىزدار»، - دەيدى بۇرىن كوفەحانا بولعان ورىننىڭ يەسى.
ەسكە سالساق، استاناداعى Qazaq coffee مەيرامحاناسى كەلۋشى قوناققا قازاق تىلىندە اس ءمازىرىن بەرۋدەن باس تارتىپ، بۇل قوعامدا ۇلكەن رەزونانس تۋدىرعان ەدى. مەيرامحاناعا كەلۋشى ءوز شاعىمىن 2GIS قوسىمشاسىنا جازعان، ال وعان جاۋاپ رەتىندە كوفەحانا اكىمشىلىگى ولاردىڭ قىزمەتكەرلەرى قازاق تىلىندە سويلەۋگە مىندەتتى ەمەس ەكەنىن ايتقان. ءسويتىپ، 2GIS قوسىمشاسىندا مىڭداعان سىني پىكىر جازىلدى. ولاردىڭ سانى 26 مىڭنان اسىپ، ال مەكەمەنىڭ رەيتينگى 1،1 جۇلدىزعا دەيىن تومەندەگەن. وسىدان كەيىن كوفەحانا اكىمشىلىگى Instagram-دا كەشىرىم سۇراپ، ءبىراق كوپ ۇزاماي ولار اككاۋنتىن جويدى.
