Facebook جەلىسىندە پايدا بولعان مىنا ءبىر تۇبىرشەكتىڭ بەرىلگەن ۋاقىتى دەگەن جەردە 24.08.2016 دەپ تۇر. دەمەك، ونىڭ الىنعانىنا — بۇگىنمەن ەكىنشى كۇن. ارى قاراي وقىلىق. ودان كەيىنگىسى مۇلدە تۇسىنىكسىز سوزدەر.
تەك سوڭعى ەكى سويلەمنەن بىرنارسە اڭعارعانداي بولاسىز: «چەكتى سيكتيڭىز!»، ياعني چەكتى ساقتاڭىز دەگىسى كەلگەنى عوي، ال راحمەتتىڭ ورنىندا „شيحمەت„ دەگەن ءسوز تۇر. ونى وقىعاندا، قولىڭىزداعى چەككە، قۇددى جان ءبىتىپ، جىرقىلداپ، ءوزىڭىزدى مازاق ەتىپ تۇرعانداي اسەردە بولادى ەكەنسىز. راسىندا، بۇل مازاق ەمەي، نەمەنە؟…
قارجىلىق الەۋەتى شەكتەۋلى شاعىن ءبىر فيرما بولسا، جارايدى، ءتۇرلى دەڭگەيدە مەنەدجەر، ماركەتينگ سىندى جاندايشاپتارى، ءتۇرلى دەڭگەيدە قاداعالاۋشىلارى بار ەلىمىزدەگى الدىڭعى قاتارداعى بانكتىڭ بۇلايشا قاتەلەسۋى مۇمكىن بە؟.. الدە ولار مۇنى قاساقانا جاساپ وتىر ما؟..
ءتىپتى، بۇل باسقا تىلدە شىعار دەپ ءوز-وزىمىزدى الداۋقىراتىپ تا كورگىمىز كەلگەن. ءبىراق بانك چەگىندەگى شاتپاق مۇلدە ەش تىلگە جاقىندامايدى دا. اقىرى، اشىقتان-اشىق قازاقتاردى قورلاعان، ءوزى جۇمىس ىستەپ، اقشا تاۋىپ وتىرعان مەملەكەتتىڭ انا ءتىلىن اياق-استى ەتكەن بانك بۇل جايتقا ب ا ق ارقىلى جاۋاپ بەرۋى كەرەك، ال قوعامدا ۇلكەن داۋ تۋعىزىپ، كوپتىڭ قۇقىعىن تاپتاپ، ار-وجدانىنا تيگەن بۇل ماسەلەنىڭ قۇزىرلى ورىندار انىق-قانىعىن ءبىلىپ، بانكتى جاۋاپقا تارتادى دەپ ەسەپتەيمىز دەپ سالىپ ەدىك.
وسى ماقالا جاريالانعان كۇنى كەشكىسىن-اق بانك بۇل ماسەلەگە قىسقا دا نۇسقا جاۋاپ قاتتى.
— بۇل جاعدايعا بايلانىستى كەشىرىم سۇرايمىز. بانك ماماندارى بۇل ماسەلەنى شەشۋ ءۇشىن جۇمىس ىستەپ جاتىر. قاتە تۇزەتىلەدى.
تەحنيكالىق اقاۋدىڭ سەبەبى انىقتالادى، — دەپتى Tengrinews.kz اگەنتتىگىنە تۇسىنىكتەمە بەرگەن اتالعان بانكتىڭ وكىلى ەرلان سادىقوۆ.
ءبىز ءوز كەزەگىمىزدە مەملەكەتتىك ءتىلدى قورلاۋعا قاتىستى بۇل فاكتى وزگەلەرگە ساباق بولىپ، ەندى مۇنداي ماسقاراعا ەشبىر مەكەمە، ءتىپتى، جەكە تۇلعا جول بەرمەسە ەكەن دەپ تىلەيمىز. ءيا، ءبىز مەملەكەتتىك ءتىل مارتەبەسىنىڭ ءوز دەڭگەيىندە ساقتالۋىن ۇنەمى قاداعالاپ وتىراتىندىعىمىزدى بارلىعىنىڭ ەسىنە سالا كەتكىمىز كەلەدى.
ەسكە سالۋ دەمەكشى، بىرەر اي بۇرىن، ءبىزدىڭ مەديا پورتالدا „سۇمدىق قوي مىناۋ! الماتىداعى كوز اۋرۋلارىن زەرتتەۋ ينستيتۋتى قازاقتى ماسقارا ەتۋدە„ دەگەن اتاۋمەن ماقالا جارىق كوردى. ول كەزدە الماتىداعى قازاق كوز اۋرۋلارى عىلىمي زەرتتەۋ ينستيتۋتىنىڭ كۇندىزگى ستاسيونارى قابىرعاسىندا ىلىنگەن ستەندتەگى مەملەكەتتىك رامىزدەر تۋرالى اقپاراتتا ءورىپ جۇرگەن قاتەلەردى اشكەرەلەگەن بولاتىنبىز.
اراعا كوپ ۋاقىت سالماي، مەكەمە اتىنان كەشىرىم سۇراعان ينستيتۋت باسشىلىعىنان، اتالعان جايتتى تۇزەۋ بويىنشا جۇمىستار جۇرگىزىپ جاتقاندىعى تۋرالى حات العان ەدىك.
دەرەككوز: kaz.365info.kz
