رەسپۋبليكالىق فيزيكا-ماتەماتيكا مەكتەبىنىڭ FIZMAT ROBOTICS كومانداسى اقش-تىڭ حيۋستون قالاسىندا وتەتىن الەمدەگى ەڭ ءىرى روبوتوتەحنيكا جارىستارىنىڭ ءبىرى – FIRST Championship تۋرنيرىندە قازاقستان اتىنان قاتىسادى، دەپ حابارلايدى Dala News.
FIRST Championship – ينجەنەريا، تەحنولوگيا جانە روبوتوتەحنيكا سالاسىنداعى مەكتەپ وقۋشىلارى اراسىنداعى ەڭ بەدەلدى حالىقارالىق جارىستاردىڭ ءبىرى. جىل سايىن بۇل چەمپيوناتقا الەمنىڭ تۇكپىر-تۇكپىرىنەن ونداعان مىڭ قاتىسۋشى جينالىپ، وزدەرىنىڭ ينجەنەرلىك جوبالارىن تانىستىرىپ، STEM سالاسىنداعى باستى جۇلدەلەر ءۇشىن ب ا ق سىنايدى.
FIZMAT ROBOTICS كومانداسى حالىقارالىق ارەناعا ەكىنشى جىل قاتارىنان شىعىپ وتىر. وسى ۋاقىت ىشىندە وقۋشىلار قازاقستاندى يتاليا، جۇڭگو، تۇركيا جانە باا-دە وتكەن تۋرنيرلەردە تانىستىرىپ، ورتالىق ازياداعى جانە ەل ىشىندەگى جارىستارعا دا قاتىسقان.
جۋىردا كوماندا Alem Tech Fest ورتالىقازيالىق كەزەڭىندە بىرنەشە ماراپاتقا يە بولدى. اتاپ ايتقاندا:
— Control Award – روبوتتى باسقارۋ مەن باعدارلامالاۋ دەڭگەيى ءۇشىن؛
— Finalist Alliance Partner – جارىستىڭ فينالدىق اليانسىنا شىققانى ءۇشىن.
كوماندا مۇشەلەرى روبوتوتەحنيكا تەك جارىس ەمەس، ناعىز كوماندالىق جۇمىس ەكەنىن ايتادى. ءار قاتىسۋشى ءوز باعىتىنا جاۋاپ بەرەدى: باعدارلامالاۋ، ينجەنەرلىك شەشىمدەر، ويىن ستراتەگياسى جانە جوبانى تانىستىرۋ.
كوماندا كاپيتاندارى الماز ساگنالين مەن اليمجان ادايدىڭ ايتۋىنشا، ناتيجەگە جەتۋدىڭ باستى قۇپياسى – بىرلىك پەن ءوزارا قولداۋ.
سونىمەن قاتار FIZMAT ROBOTICS مۇشەلەرى قازاقستانداعى روبوتوتەحنيكا قوزعالىسىن دامىتۋعا دا ۇلەس قوسىپ ءجۇر. ولار ەلىمىزدىڭ ءتۇرلى وڭىرلەرىندەگى ونداعان مەكتەپ كوماندالارىنا مەنتورلىق جاساپ، جاس وقۋشىلارعا ينجەنەريا مەن باعدارلامالاۋدىڭ نەگىزدەرىن ۇيرەتەدى.
ءقازىر كوماندا الەم چەمپيوناتىنا قىزۋ دايىندىق ۇستىندە. وقۋشىلار روبوتتىڭ كونسترۋكسياسىن جەتىلدىرىپ، جاڭا ينجەنەرلىك شەشىمدەردى سىناپ، جارىس ستراتەگياسىن پىسىقتاپ جاتىر.
كوماندا مۇشەلەرىنىڭ ايتۋىنشا، الەم چەمپيوناتىنا قاتىسۋ – تەك جارىس ەمەس، قازاقستاندى جوعارى تەحنولوگيالى ەلدەردىڭ قاتارىنا قوسۋعا دەگەن ارمانعا جاسالعان تاعى ءبىر قادام.
