2024 جىلدىڭ قازان ايىندا جىلدىق ينفلياسيا قايتادان ەكپىن الىپ، قىركۇيەكتەگى 8،3%-دان دا اسىپ 8،5%-عا جەتتى. باعالاردىڭ ءبىر ايداعى ءوسۋ قارقىنى دا الدىڭعى ايمەن سالىستىرعاندا جەدەلدەپ، 0،9%-عا جەتتى (0،4%)، دەلىنگەن ۇلتتىق بانكتىڭ ينفلياسيالىق ۇردىستەرگە شولۋىندا.

ازىق-تۇلىك ينفلياسياسى

2024 جىلدىڭ قازان ايىندا ازىق-تۇلىك باعاسىنىڭ جىلدىق ءوسۋ قارقىنى 4،9%-عا دەيىن باياۋلادى. جۇمىرتقا، قانت جانە كونديتەرلىك ونىمدەر، ەت جانە ەت ونىمدەرى، نان-توقاش ونىمدەرى مەن جارمالاردىڭ باعاسىنىڭ ءوسۋ قارقىنىنىڭ باياۋلاۋى دەزينفلياسيالىق اسەردىڭ نەگىزگى فاكتورلارى بولىپ وتىر. سونىمەن قاتار، مايلار مەن توڭ مايلار، جەمىستەر مەن كوكونىستەر، كوفە، شاي جانە كاكاو جىلدىق ازىق-تۇلىك ينفلياسياسىنا پروينفلياسيالىق ۇلەس قوستى.

"2024 جىلدىڭ قازان ايىندا ازىق-تۇلىك باعاسى ايلىق ماندە 0،4%-عا ءوستى (2024 جىلعى قىركۇيەكتە – 0%). ايلىق ازىق-تۇلىك ينفلياسياسىنا جۇمىرتقا، مايلار مەن توڭ مايلار، بالىق جانە تەڭىز ونىمدەرىنىڭ باعاسىنىڭ ءوسۋى قاتتى قىسىم ءتۇسىردى"،- دەيدى ق ر ۇلتتىق بانكى.

باعانىڭ قىمباتتاۋىنىڭ نەگىزگى سەبەبى – اۋىل شارۋاشىلىعىندا جۇمىرتقا وندىرۋشىلەرىنىڭ باعاسىنىڭ ايتارلىقتاي ءوسۋى. سونىمەن قاتار، مايلار مەن توڭ مايلار باعاسىنىڭ ءوسۋى دە ازىق-تۇلىك ينفلياسياسىنا قوسىمشا قىسىم ءتۇسىردى.

2024 جىلدىڭ قازان ايىندا ولاردىڭ باعاسى 1،7%-عا ءوستى (قىركۇيەكتە – 1،8%). بۇل ءوسىم اۋىل شارۋاشىلىعىندا كۇنباعىس باعاسىنىڭ وسۋىنە بايلانىستى مايلار مەن توڭ مايلار وندىرۋشىلەردىڭ باعاسىنىڭ وسۋىنە، سونداي-اق الەمدىك نارىقتاعى ماي باعاسىنىڭ وسۋىنە بايلانىستى بولدى.

2024 جىلدىڭ قازان ايىندا ەت باعاسىنىڭ ءبىر ايداعى ءوسۋ قارقىنى 0،2% بولدى. بۇل ساناتتا ەڭ كوپ ءوسىم قۇس ەتىندە بايقالىپ، ونىڭ باعاسى ءبىر ايدا 0،4%-عا ءوستى. تاۋىق ەتىنىڭ قىمباتتاۋى اۋىل شارۋاشىلىعى ونىمدەرىن وندىرۋشىلەردىڭ باعاسىنىڭ ايتارلىقتاي وسۋىمەن تۇسىندىرىلەدى. ال باسقا ەت تۇرلەرىنىڭ باعاسى ورتاشا دەڭگەيدە عانا ءوستى.

ءبىر ايداعى ازىق-تۇلىك ينفلياسياسىن تومەندەتكەن تاۋارلار – جەمىس-جيدەك پەن كوكونىس، قانت، دجەم، بال، شوكولاد جانە كونديتەرلىك ونىمدەر.

2024 جىلدىڭ قازان ايىندا جەمىس-جيدەك پەن كوكونىس باعاسى 1،1%-عا تومەندەدى. جەمىستەر ىشىندە باعانىڭ تومەندەۋىن نەگىزگى قوزعاۋشى تاۋارلار – ءجۇزىم (-5،7%)، الما (-3،4%) جانە المۇرت (-2،2%) بولدى. سونىمەن قاتار، كيۆي (7،8%)، ليمون (7%)، اپەلسين (6،7%) جانە بانان (2،4%) باعاسىنىڭ ءوسۋى تىركەلدى.

كوكونىستەردەن ءسابىز (-10%)، قىزىلشا (-3،2%)، پياز (-2،8%) جانە كارتوپ (-2،1%) باعاسى تومەندەدى. بۇل باعانىڭ تومەندەۋى ماۋسىمدىق سيپاتقا يە جانە ەگىن جيناۋ ناۋقانىمەن بايلانىستى.

"دەگەنمەن، كوكونىستەردىڭ باعاسى ايلىق ماندە 0،7%-عا ءوستى، بۇل – جالپى كوكونىس قۇنىنىڭ 2024 جىلعى ناۋرىزدان بەرى العاش رەت ءوسۋى. اسىرەسە، قيار (9،7%)، قىزاناق (8،6%)، ءتۇرلىتۇستى قىرىققابات (6،9%) جانە سارىمساق (6،8%) باعاسىنىڭ ايتارلىقتاي وسكەنى بايقالدى. قانتتىڭ تۇتىنۋ باعاسى 2024 جىلدىڭ قازان ايىندا 1،6%-عا تومەندەدى".

قانتتىڭ بەس اي قاتارىنان ارزانداۋى قانت وندىرۋشىلەردىڭ باعاسىنىڭ تومەندەۋىنە بايلانىستى.

"الايدا، 2024 جىلعى قاڭتار-تامىزداعى مالىمەتتەرگە سايكەس، قانتتىڭ شامامەن 72%-ى يمپورتتالاتىنىن ەسكەرە وتىرىپ، كەيىنگى 2 ايدا الەمدىك قانت باعاسىنىڭ ءوسۋى ونىڭ الداعى قۇنىنا اسەر ەتۋى مۇمكىن"، دەلىنگەن شولۋدا.

ازىق-تۇلىك ەمەس تاۋارلار ينفلياسياسى

2024 جىلدىڭ قازان ايىندا ازىق-تۇلىك ەمەس تاۋارلاردىڭ جىلدىق باعاسىنىڭ ءوسىمى 7،8%- عا دەيىن جەدەلدەدى (2024 جىلعى قىركۇيەكتە – 7،6%). 

2024 جىلدىڭ قازان ايىندا ازىق-تۇلىك ەمەس تاۋارلاردىڭ ايلىق باعاسىنىڭ ءوسۋى 1%-عا دەيىن جەدەلدەدى (2024 جىلعى قىركۇيەكتە – 0،6%). بۇل جەدەلدەۋگە كوپ ۇلەس قوسقان دىبىسبەينە شولۋ جابدىعى مەن فوتواپپاراتتاردىڭ، سونداي-اق اقپاراتتى وڭدەۋ جابدىقتارىنىڭ (7،8%)، ونىڭ ىشىندە تەلەديدارلاردىڭ (10%)، نوۋتبۋكتەردىڭ (7،8%) جانە پلانشەتتەردىڭ (7،7%) باعاسىنىڭ كوتەرىلۋى بولدى.

سونىمەن قاتار، تۇرمىستىق تەحنيكالاردىڭ (2،6%)، ونىڭ ىشىندە اس ءۇي پليتالارىنىڭ (8،3%)، توڭازىتقىشتاردىڭ (7،7%) جانە كىر جۋاتىن ماشينالاردىڭ (6،2%) باعاسىنىڭ وسكەنى بايقالدى.

"بۇل تاۋارلاردىڭ باعاسى نومينالدى تەڭگە باعامىنىڭ السىرەۋىنە بايلانىستى باعانىڭ وزگەرۋى جالعاسقاندىقتان ارتتى. سونىمەن قاتار، قازاندا اياق كيىمنىڭ (1،3%) جانە قاتتى وتىننىڭ (2%) باعاسىنىڭ ماۋسىمدىق فاكتورلارعا بايلانىستى ايتارلىقتاي وسكەنى تىركەلدى، ال اياق كيىم باعاسىنا باعام فاكتورىنىڭ اسەرى دە كۇشەيدى".

بۇعان قوسا، قازاندا شىنى بۇيىمدارى، اس ءۇي ىدىستارى جانە تۇرمىستىق زاتتاردىڭ باعاسى (2،8%-عا)، سونداي-اق كىتاپتار مەن كەڭسە تاۋارلارىنىڭ باعاسى (0،1%-عا) تومەندەگەنى بايقالدى.

ق ر ۇلتتىق بانك شولۋىندا 2024 جىلعى ماۋسىمدا تەڭگەنىڭ نومينالدى ايىرباس باعامىنىڭ السىرەۋى يمپورتتاۋ باعالارىنىڭ ءوسۋىن جەدەلدەتكەنى دە ايتىلادى.

بيىلعى تامىزدا تەلەفون، توڭازىتقىش، كىر جۋاتىن ماشينا، پرينتەر، سانيتارلىق جانە تۇرمىستىق تەحنيكانى يمپورتتاۋ باعالارى ءوستى. يمپورتتالاتىن دارى-دارمەك ودان ارى قىمباتتاپ جاتىر، ولاردىڭ ىشكى تۇتىنۋداعى ۇلەسى جەرگىلىكتى ءوندىرىس كولەمىنەن ايتارلىقتاي ارتىق. يمپورتتىق جابدىقتاردىڭ باعاسىنىڭ ءوسۋى ءوندىرىس شىعىندارىنىڭ ارتۋىنا جانە شىعارىلاتىن ونىمدەردىڭ قىمباتتاۋىنا اكەلۋى مۇمكىن.