پرەزيدەنتتىڭ تاپسىرماسىنا سايكەس، مەملەكەتكە قايتارىلعان اكتيۆتەر الەۋمەتتىك ماڭىزى بار جوبالارعا باعىتتالۋدا. وسى ماقساتتا ۇكىمەت ارنايى مەملەكەتتىك قوردان جەتىسۋ وبلىسى، كەربۇلاق اۋدانى، كوكساي اۋىلىندا جاڭا مەكتەپتىڭ قۇرىلىسىنا 1،4 ملرد تەڭگە ءبولدى، دەپ حابارلايدى Dalanews.kz.
قازىرگى تاڭدا اۋىلدا 53 وقۋشى ەكى اۋىسىمدا وقيتىن جالعىز مەكتەپ بار. ءبىلىم ورداسىندا سپورت جانە اكت زالدارى، اسحانا جوق، سونداي-اق پاندىك كابينەتتەردىڭ جەتىسپەۋى وقۋ پروسەسىنە كەرى اسەر ەتۋدە. بۇل ماسەلەنى شەشۋ ءۇشىن 60 ورىندىق جاڭا مەكتەپ بوي كوتەرمەك.
جاڭا وقۋ ورنى زاماناۋي ستاندارتتارعا ساي سالىنىپ، اۋىل وقۋشىلارىنا ساپالى ءبىلىم الۋعا مۇمكىندىك بەرەدى. سونىمەن قاتار، مەكتەپتەگى ورىن تاپشىلىعى دا رەتتەلمەك. ءقازىردىڭ وزىندە اۋىلدا 7 جاسقا دەيىنگى 28 بالا بار، ياعني الداعى جىلدارى وقۋشى سانى ارتا تۇسپەك.
جالپى، ۇكىمەت ارنايى مەملەكەتتىك قور ەسەبىنەن 58 ملرد تەڭگەنى الەۋمەتتىك ماڭىزى بار نىسانداردىڭ قۇرىلىسىنا باعىتتاعان.
بۇل قاراجات ەسەبىنەن 5 مەكتەپ (بىرەۋى – مۋزىكالىق)، 2 سپورت كەشەنى، كوپسالالى اۋرۋحانا، جاتاقحانا، 2 بالاباقشا جانە جەدەل مەديسينالىق جاردەم ستانساسى سالىنادى.
سونىمەن قاتار، ارقالىق، استانا جانە الماتى قالالارىندا زاڭسىز يەمدەنىلگەن اكتيۆتەردى قايتارۋ اياسىندا ءبىرقاتار الەۋمەتتىك ينفراقۇرىلىم نىساندارىنىڭ قۇرىلىسى جۇرگىزىلۋدە.
بۇل باعىتتاعى جۇمىستار جالعاسادى.
