جامبىل وبلىسىنداعى جارالىستان كەيىن جوعالىپ كەتكەن جاۋىنگەردىڭ جاقىندارى بۇگىن شۋ شىعاردى.

ولار باۋىرجان داۋىتبايەۆتى ىزدەۋ جۇمىسى سىلبىر ءجۇرىپ جاتىر دەپ شاعىم ايتىپ وتىر، دەپ حابارلايدى Dalanews.kz كتك ارناسىنا سىلتەمە جاساپ.

ال اسكەريلەر ءىز-تۇزسىز كەتكەن كىشى سەرجانتتى تابۋعا بار كۇشىمىزدى سالىپ جاتىرمىز دەپ اقتالدى. ءتىپتى ىزدەۋ جۇمىستارىنىڭ قارقىندى ءجۇرىپ جاتقانىن دالەلدەۋ ءۇشىن باۋىرجاننىڭ تۋىستارىن جارىلىس بولعان اۋماققا كىرگىزۋگە ءماجبۇر بولدى.

باۋىرجان داۋىتبايەۆتان 14 كۇننەن بەرى حابار جوق. ونىڭ نە ءولى، نە ءتىرى ەكەنى بەلگىسىز. جارىلىس بولعان اۋماق تا، اۋىل-ايماق تا تۇگەل تەكسەرىلدى. ءبىراق ونى كوردىم-بىلدىم دەگەن ءتىرى جان جوق.

ال 34 جاستاعى جاۋىنگەردى ۇيىندە ءتورت بالاسى مەن جارى كۇتىپ وتىر. اتا-اناسى دا جارتى ايدان بەرى جانىن قويارعا جەر تاپپاي وتىر. ولار باۋىرجان ءتىرى دەگەن ۇمىتتە. سوندىقتان ىزدەۋ جۇمىستارىن كۇشەيتۋ كەرەك دەيدى.

“ادام از، بۇكىل قازاقستاننىڭ اسكەريلەرىن شاقىرسىن. نەگە شاقىرمايدى؟ اقپارات بەرىپ وتىر، 100 ادام دەپ، قايداعى! نەبارى 15 ادام ءجۇر”، – دەيدى باۋىرجاننىڭ اناسى فاريدا اعىبەكوۆا. 

قاۋمالاعان كىسىلەردىڭ ءبارى باۋىرجاننىڭ جاقىندارى. بۇگىن ولار اتىشۋلى اسكەري ءبولىمنىڭ الدىنا جينالدى.

"ىزدەۋ جۇمىستارىنا كوڭىلىمىز تولمايدى" دەگەندەر جارىلىس بولعان اۋماققا كىرىگىزۋدى تالاپ ەتتى. سول جەردەگى اتقارىلىپ جاتقان ءىستى كوزبەن كورۋىمىز كەرەك دەپ بايبالام سالدى. كەيىن اسكەريلەر امالسىز باۋىرجاننىڭ اكەسى باستاعان ءۇش ادامدى ىشكە وتكىزىپ، جارىلعان قويمانى كورسەتىپ قايتتى.

“ءبارىن توڭكەرىپ تاستادى. قايدا كەتۋى مۇمكىن؟ قايتا كەتەدى، توڭكەرىپ جاتىر. ءۇش مارتە توپىراقتى بىلاي الىپ، قايتا بىلاي قويدى. تورمەن جۇمىس ىستەدى”، – دەيدى اسكەريدىڭ اكەسى تالعات داۋىتبايەۆ.

ال اسكەريلەر باۋىرجان داۋىتبايەۆ جارالىس وشاعىنان نەبارى 30-40 مەتر جەردە بولعان دەيدى. ياعني وقىس وقيعا كەزىندە قويمادا جۇرگەن. ونى سول ماڭنان سوڭعى رەت كورگەن ارىپتەستەرى ايتىپ بەرگەن. سوندىقتان دا جارىلىس بولعان اۋماق مۇقيات تەكسەرىپ جاتىر. ءبىراق ىزدەۋ وڭايعا سوعىپ جاتقان جوق. سەبەبى جارالىستان كەيىن وندا تەرەڭدىگى 20 مەترلىك ور پايدا بولىپ، اينالاسى توپىراققا كومىلىپ قالعان ەكەن.

“سەنسەڭىزدەر، ءبىز ۇيىلگەن توپىراقتى قوپارىپ الىپ، ونى ەلەكتەن وتكىزىپ قاراپ جاتىرمىز. 14 كۇنەن توقتاۋسىز جۇمىس ىستەپ جاتىرمىز. ءبىزدىڭ مىندەتىمىز – باۋىرجان داۋىتبايەۆتى تابۋ. سول جەردە بار، نە جوق ەكەنىنە كوز جەتكىزۋىمىز كەرەك”، – دەيدى تاراز باسپا ءسوز قىزمەتىنىڭ باستىعى دينا مۋحارينوۆا.

26 تامىزدا جامبىل وبلىسى بايزاق اۋدانىنداعى اسكەري بولىمنەن ءورت شىعىپ، ارتىنان جويقىن جارىلىستار بولعان. وقىس وقيعادان 16 ادام اجال قۇشىپ، 26 ناۋقاس ءالى كۇنگە اۋرۋحانادا جاتىر . ال ءتىلسىز جاۋدىڭ نەدەن تۇتانعانى ازىرگە بەلگىسىز.

https://www.youtube.com/watch؟v=rMKWPs-XxPk