Olar Baýyrjan Dáýitbaevty izdeý jumysy sylbyr júrip jatyr dep shaǵym aityp otyr, dep habarlaidy Dalanews.kz KTK arnasyna silteme jasap.
Al áskeriler iz-túzsiz ketken kishi serjantty tabýǵa bar kúshimizdi salyp jatyrmyz dep aqtaldy. Tipti izdeý jumystarynyń qarqyndy júrip jatqanyn dáleldeý úshin Baýyrjannyń týystaryn jarylys bolǵan aýmaqqa kirgizýge májbúr boldy.
Baýyrjan Dáýitbaevtan 14 kúnnen beri habar joq. Onyń ne óli, ne tiri ekeni belgisiz. Jarylys bolǵan aýmaq ta, aýyl-aimaq ta túgel tekserildi. Biraq ony kórdim-bildim degen tiri jan joq.
Al 34 jastaǵy jaýyngerdi úiinde tórt balasy men jary kútip otyr. Ata-anasy da jarty aidan beri janyn qoiarǵa jer tappai otyr. Olar Baýyrjan tiri degen úmitte. Sondyqtan izdeý jumystaryn kúsheitý kerek deidi.
“Adam az, búkil Qazaqstannyń áskerilerin shaqyrsyn. Nege shaqyrmaidy? Aqparat berip otyr, 100 adam dep, qaidaǵy! Nebári 15 adam júr”, – deidi Baýyrjannyń anasy Farida Aǵybekova.
Qaýmalaǵan kisilerdiń bári Baýyrjannyń jaqyndary. Búgin olar atyshýly áskeri bólimniń aldyna jinaldy.
"Izdeý jumystaryna kóńilimiz tolmaidy" degender jarylys bolǵan aýmaqqa kirigizýdi talap etti. Sol jerdegi atqarylyp jatqan isti kózben kórýimiz kerek dep baibalam saldy. Keiin áskeriler amalsyz Baýyrjannyń ákesi bastaǵan úsh adamdy ishke ótkizip, jarylǵan qoimany kórsetip qaitty.
“Bárin tóńkerip tastady. Qaida ketýi múmkin? Qaita ketedi, tóńkerip jatyr. Úsh márte topyraqty bylai alyp, qaita bylai qoidy. Tormen jumys istedi”, – deidi áskeridiń ákesi Talǵat Dáýitbaev.
Al áskeriler Baýyrjan Dáýitbaev jaralys oshaǵynan nebári 30-40 metr jerde bolǵan deidi. Iaǵni oqys oqiǵa kezinde qoimada júrgen. Ony sol mańnan sońǵy ret kórgen áriptesteri aityp bergen. Sondyqtan da jarylys bolǵan aýmaq muqiiat tekserip jatyr. Biraq izdeý ońaiǵa soǵyp jatqan joq. Sebebi jaralystan keiin onda tereńdigi 20 metrlik or paida bolyp, ainalasy topyraqqa kómilip qalǵan eken.
“Senseńizder, biz úiilgen topyraqty qoparyp alyp, ony elekten ótkizip qarap jatyrmyz. 14 kúnen toqtaýsyz jumys istep jatyrmyz. Bizdiń mindetimiz – Baýyrjan Dáýitbaevty tabý. Sol jerde bar, ne joq ekenine kóz jetkizýimiz kerek”, – deidi Taraz baspasóz qyzmetiniń bastyǵy Dina Mýharinova.
26 tamyzda Jambyl oblysy Baizaq aýdanyndaǵy áskeri bólimnen órt shyǵyp, artynan joiqyn jarylystar bolǵan. Oqys oqiǵadan 16 adam ajal qushyp, 26 naýqas áli kúnge aýrýhanada jatyr . Al tilsiz jaýdyń neden tutanǵany ázirge belgisiz.
https://www.youtube.com/watch?v=rMKWPs-XxPk
