«بۇگىن 10 ساعات 54 مينۋتتا بەلگىسىز قىلمىسكەر المالى اۋداندىق ىشكى ىستەر دەپارتامەنتىنە جاقىنداعاندا كەزەكشى ودان قۇجات كورسەتۋدى تالاپ ەتكەن. ول پيستولەتتى الىپ شىعىپ، ەكى رەت وق اتتى. كۇزەتشى جاراقات الدى. سوسىن ول پوليسەيدىڭ اۆتوماتىن تارتىپ الىپ، كەزەكشىلىك بولىمىنە، سونداي-اي دەپارتامەنتتىڭ اۋلاسىندا تۇرعان ادامدارعا بىرنەشە رەت وق جاۋدىردى. سول كەزدە ءتورت پوليسەي جاراقاتتاندى. ءبىر قاراپايىم ازامات، ءبىزدىڭ زەينەتكەرىمىز كوز جۇمدى»، - دەپ اتاپ كورسەتتى مينيستر.

ونىڭ ايتۋىنشا، ىشكى ىستەر دەپارتامەنتىنە جاساعان شابۋىلدان كەيىن قىلمىسكەر كوشەگە اتىپ شىعىپ، كولىك توقتاتقان. جۇرگىزۋشىنى قارۋمەن قورقىتىپ، بايزاقوۆ كوشەسىنە تۇسۋگە بۇيرىق بەردى.

«جول-جونەكەي ول دابىل بويىنشا كەلە جاتقان پاترۋلدىك پوليسيا قىزمەتكەرلەرىنە وق اتقان. ال ۇلتتىق قاۋىپسىزدىك دەپارتامەنتىنە كەلگەندە كولىكتەن شىعىپ، تاعى ءبىر ماشيناعا وق جاۋدىردى. ءسويتىپ، تاعى ءبىزدىڭ ەكى قىزمەتكەرىمىزدى جارالادى. وسىنى پايدالانىپ، ونىڭ جۇرگىزۋشىسى قاشىپ كەتتى. قازىرگى كەزدە ءبىز ونى تاپتىق»، - دەيدى مينيستر.

وسىدان كەيىن قىلمىسكەر تاعى ءبىر ماشينانى توقتاتقان. ول كولىكتە شەكارا قىزمەتىنىڭ اعا سەرجانتى بولعان.

«ونىمەن بىرگە ول ابايا كوشەسىنە دەيىن جەتىپ الدى. ءبىراق وعان قارسىلىق كورسەتكەن سياقتى. ءۇشىنشى مەكەن-جايعا كەلگەندە پوستتا تۇرعان پوليسەيلەرمەن اتىسا باستادى. بىرەۋى قاتتى جاراقاتتانىپ، قايتىس بولدى. ال ەكىنشىسى قىلمىسكەردى جارالاپ، قولىنا كىسەن سالدى. بارلىق قارۋ-جاراق – پيستولەت پەن اۆتومات تاركىلەندى»، - دەدى ق.قاسىموۆ.

ايتا كەتەيىك، كەڭەس كەزىندە ۇلتتىق قاۋىپسىزدىك كوميتەتىنىڭ باسشىسى ۆلاديمير جۇماقانوۆ قىلمىسكەردىڭ كىم ەكەنىن ايتىپ بەردى. ونىڭ ايتۋىنشا، 27 جاسار رۋسلان كۇلىكبايەۆ بۇعان دەيىن ەكى رەت سوتتالعان. تۇرمەدە ول سالافيتتەرمەن جاقىنداسىپ كەتكەن. ءوز كەزەگىندە مەملەكەت باسشىسى بۇگىنگى وقيعادا جاراقات العان جانە قازا بولعانداردىڭ تۋىس-تۋعاندارىنا كوڭىل ايتىپ، قۇزىرەتتى مەملەكەتتىك ورگاندارعا ءتيىستى كومەك بەرۋدى تاپسىردى.