Aqordada ótken Qaýipsizdik keńesiniń shuǵyl otyrysynda ishki ister ministri Qalmuhambet Qasymov Prezidentke Almatydaǵy atystyń hronologiiasyn aityp berdi. Onyń sózine qaraǵanda, túnde qylmysker jeńil júristi áieldi atyp tastaǵan. Al tańerteń Almaly aýdandyq ishki ister men ulttyq qaýipsizdik departamentterine shabýyl jasady, dep habarlaidy Baq.kz portaly Aqordanyń baspasóz qyzmeti taratqan beine materialǵa silteme jasap.
«Búgin 10 saǵat 54 minýtta belgisiz qylmysker Almaly aýdandyq ishki ister departamentine jaqyndaǵanda kezekshi odan qujat kórsetýdi talap etken. Ol pistoletti alyp shyǵyp, eki ret oq atty. Kúzetshi jaraqat aldy. Sosyn ol politseidiń avtomatyn tartyp alyp, kezekshilik bólimine, sondai-ai departamenttiń aýlasynda turǵan adamdarǵa birneshe ret oq jaýdyrdy. Sol kezde tórt politsei jaraqattandy. Bir qarapaiym azamat, bizdiń zeinetkerimiz kóz jumdy», - dep atap kórsetti ministr.
Onyń aitýynsha, ishki ister departamentine jasaǵan shabýyldan keiin qylmysker kóshege atyp shyǵyp, kólik toqtatqan. Júrgizýshini qarýmen qorqytyp, Baizaqov kóshesine túsýge buiryq berdi.
«Jol-jónekei ol dabyl boiynsha kele jatqan patrýldik politsiia qyzmetkerlerine oq atqan. Al ulttyq qaýipsizdik departamentine kelgende kólikten shyǵyp, taǵy bir mashinaǵa oq jaýdyrdy. Sóitip, taǵy bizdiń eki qyzmetkerimizdi jaralady. Osyny paidalanyp, onyń júrgizýshisi qashyp ketti. Qazirgi kezde biz ony taptyq», - deidi ministr.
Osydan keiin qylmysker taǵy bir mashinany toqtatqan. Ol kólikte shekara qyzmetiniń aǵa serjanty bolǵan.
«Onymen birge ol Abaia kóshesine deiin jetip aldy. Biraq oǵan qarsylyq kórsetken siiaqty. Úshinshi meken-jaiǵa kelgende postta turǵan politseilermen atysa bastady. Bireýi qatty jaraqattanyp, qaitys boldy. Al ekinshisi qylmyskerdi jaralap, qolyna kisen saldy. Barlyq qarý-jaraq – pistolet pen avtomat tárkilendi», - dedi Q.Qasymov.
Aita keteiik, keńes kezinde ulttyq qaýipsizdik komitetiniń basshysy Vladimir Jumaqanov qylmyskerdiń kim ekenin aityp berdi. Onyń aitýynsha, 27 jasar Rýslan Kúlikbaev buǵan deiin eki ret sottalǵan. Túrmede ol sáláfittermen jaqyndasyp ketken. Óz kezeginde Memleket basshysy búgingi oqiǵada jaraqat alǵan jáne qaza bolǵandardyń týys-týǵandaryna kóńil aityp, quziretti memlekettik organdarǵa tiisti kómek berýdi tapsyrdy.
