"مەملەكەت بارلىق ايماقتا سپورت ينفراقۇرىلىمىن دامىتۋعا باسا ءمان بەرەدى. بيىل استانادا ۇلتتىق سپورت ۋنيۆەرسيتەتىنىڭ، تۇركىستاندا ەسكەك ەسۋ سپورتىنا ارنالعان كانالدىڭ، قىزىلوردادا فۋتبول ستاديونىنىڭ، جەتىسۋ وبلىسىندا دەنەشىنىقتىرۋ-ساۋىقتىرۋ كەشەنىنىڭ، ورالدا ەرەكشە قاجەتتىلىگى بار ادامدارعا ارنالعان سپورت كەشەنىنىڭ قۇرىلىسى اياقتالادى". بۋرابايدا ءوتىپ جاتقان ۇلتتىق قۇرىلتايدىڭ IV وتىرىسىندا وسىلاي دەگەن مەملەكەت باسشىسى وزگە وڭىرلەردە دە قولعا الىنىپ جاتقان الەۋمەتتىك جوبالارعا، الەۋمەتتىك سالىققا، ءوڭىر اكىمدەرىنىڭ جۇمىسىنا دا توقتالدى، دەپ حابارلايدى Dalanews.kz.
"...بيىل كوكشەتاۋدا كوپفۋنكسيونالدى سپورت كەشەنىنىڭ قۇرىلىسى باستالادى. بۇل قازاقستاندا تەڭدەسى جوق ورتالىق بولماق. وسى جوبانى ارناۋلى مەملەكەتتىك قوردان، ياعني زاڭسىز اكتيۆتەردى قايتارۋ ەسەبىنەن قارجىلاندىرۋ كەرەك. ۇكىمەتكە وسى ماسەلەنى پىسىقتاۋدى تاپسىرامىن"، - دەدى مەملەكەت باسشىسى ءوز سوزىندە.
سونداي-اق پرەزيدەنت ءۇش جىلدىڭ ىشىندە 2 تريلليون تەڭگەدەن استام زاڭسىز اكتيۆتەر ەلگە قايتارىلعانىن، بۇل قارجىنىڭ ايماقتارداعى وزەكتى ەكونوميكالىق جانە الەۋمەتتىك ماسەلەلەردى شەشۋگە جۇمسالىپ جاتقانى وتە ماڭىزدى بولىپ تابىلاتىنىن باسا اتاپ ءوتتى.
"قۋاتتى ايماقتار – قۋاتتى ەل" ۇستانىمى – مەنىڭ ساياسي باعدارىمداعى مىزعىماس قاعيدانىڭ ءبىرى. ۇكىمەت وسى قاعيدانى نەگىزگە الا وتىرىپ، وبلىستاردىڭ ەنشىسىندەگى الەۋمەتتىك سالىقتى ساقتاپ قالۋ تۋرالى شەشىم قابىلدادى. الايدا وبلىس اكىمدەرى بيۋدجەت قارجىسىن ۇنەمدەپ، ءتيىمدى پايدالانۋى كەرەك. ەلگە پايداسى تيەتىن الەۋمەتتىك ماڭىزى بار جوبالارعا باسىمدىق بەرۋ قاجەت. بۇگىن ايتىلعان باستامالار مەن جوبالار ايماقتاردىڭ بىركەلكى دامۋىنا ىقپال ەتىپ، ەلىمىزدىڭ ودان ءارى وركەندەۋىنە جول اشادى دەپ سەنەمىن"، - دەدى قاسىم-جومارت توقايەۆ.
