ەرلان تىنىمباي ۇلى بۇل قىزمەتكە قازاقستاندا اقپاراتتىق قاۋىپسىزدىكتى كۇشەيتۋگە، سوڭعى جىلدارى قاتتى السىرەپ قالعان مەملەكەتتىك اقپاراتتىق يدەولوگيالىق باعىتتى قالپىنا كەلتىرۋگە جانە ستراتەگيالىق ماڭىزى زور جۇمىستى اتقارۋ ءۇشىن ەلباسىنىڭ شەشىمىمەن تاعايىندالدى.
ەرلان تىنىمباي ۇلىنىڭ وسى قىزمەتكە تاعايىندالعانىن اقپارات جانە كوممۋنيكاسيالار ءمينيسترى داۋرەن ابايەۆ حابارلادى.
«بۇگىن «قازاقستان» رترك» اق ۇجىمىنا جاڭا باسشى – ەرلان ءقاريندى تانىستىردىم. ەرلان تىنىمباي ۇلى ءبىلىكتى ساياساتتانۋشى، يدەولوگ، ەلىمىزدىڭ شىنايى پاتريوتى رەتىندە كوپشىلىككە جاقسى تانىس ەكەنىنە ەش كۇمانىم جوق. ەندىگى جەردە وعان ەلىمىزدەگى ەڭ ءىرى مەديا قۇرىلىمنىڭ جۇمىسىن ودان ءارى دامىتۋ تاپسىرىلىپ وتىر. ەرلان تىنىمباي ۇلى بۇعان دەيىنگى ىرگەلى شارالاردى ودان ءارى جالعاستىرىپ، كورپوراسيانى جاڭا دەڭگەيگە كوتەرەدءى دەپ سەنەمىن»، – دەپ جازدى مينيستر الەۋمەتتىك جەلىدەگى پاراقشاسىندا.
بۇل تەلەراديوكورپوراسيا جانە ونىڭ قۇرامىنا كىرەتىن اقپاراتتىق اگەنتتىكتەر مەملەكەتتىك ساياساتتى قۇرايدى ءارى مەملەكەتتىك ساياساتتى ناسيحاتتايدى. «قازاقستان» رەسپۋبليكالىق تەلەراديوكورپوراسيا قۇرامىنا «قازاقستان» ۇلتتىق تەلەارناسى، «KAZsport» تەلەارناسى، «بالاپان» تەلەارناسى، «مادەنيەت» تەلەارناسى، قازاق راديوسى، «شالقار» راديوسى، «استانا» راديوسىن جانە دە ايماقتىق تەلەراديوكومپانيالار كىرەدى. ول قازاقستانداعى جانە ايماقتاعى ەڭ ءىرى تەلەراديوكورپوراسيا بولىپ تابىلادى.
ەرلان تىنىمباي ۇلى قارين – مەملەكەت جانە قوعام قايراتكەرى، ساياساتتانۋشى عالىم.
2014 جىلدىڭ 16 قازان كۇنىنەن باستاپ ق ر پرەزيدەنتى جانىنداعى ستراتەگيالىق زەرتتەۋلەر ينستيتۋتىنىڭ ديرەكتورى قىزمەتىن اتقارعان. ايتا كەتەر بولساق، ەرلان تىنىمباي ۇلى باسشىلىققا كەلگەننەن كەيىن، قسزي – الەمنىڭ 6 مىڭنان استام ساراپتامالىق ينستيتۋتتارى مەن ورتالىقتارىنىڭ ىشىندە ۇزدىك 150-گە كىردى. وسىعان دەيىن، بۇل تەلەراديوكورپاراسيانى مەنەدجەرلەر مەن كادرلىق جۋرناليستتەر باسقارعان بولاتىن. تەلەراديوكورپوراسيا باسشىلىعىنا تۇڭعىش رەت ساياسي قايراتكەر تاعايىندالىپ جاتىر.
دەرەككوز: قامشى پورتالى
