ءازىربايجان حالىقارالىق بانكىنە سالىنعان حالىقتىڭ اقشاسى مىندەتتى تۇردە قايتادى. بۇنداي مالىمدەمەنى زەينەتاقى قورىنىڭ ديرەكتورلار كەڭەسىنىڭ مۇشەلىگىنە ەنگەن قايرات كەلىمبەتوۆ جاسادى. ەندى ميللونداعان ازاماتتاردىڭ اقشاسىن ءازىربايجان بانكى ەمەس، ۇكىمەتى وتەۋى ءتيىس، – دەپ حابارلايدى كتك ارناسى.

– ادامداردىڭ زەينەتاقى اقشاسى تۋرالى ۋايىمى وسىمەن سەيىلەدى دەپ ويلايمىن. ينۆەستيسيا تولىق قايتارىلادى. مەن قارىزدىڭ وڭتايلاندىرىلۋىنا قاتىسىپ جاتىرمىن. بۇنداي جۇمىستا تاجىريبەسى بار ادامدار قازاقستاندا از. سوندىقتان ۇكىمەت ماعان قولقا سالدى، – دەدى قايرات كەلىمبەتوۆ.

قارىزدى بانكتەن ءازىربايجان ۇكىمەتكە جۇكتەۋ بويىنشا داۋىس بەرۋ جاقىن كۇندەرى وتپەك. حالىقتىڭ 71 ملرد تەڭگە زەينەتاقى جيناعى كەزىندە ءازىربايجان بانكىنە كەلىمبەتوۆتىڭ ءوزىنىڭ پارمەن بەرۋىمەن سالىنعانى بەلگىلى. وسى كەلەڭسىز جايتتەن كەيىن، ۇلتتىق بانك ەندى جەكەمەنشىك زەينەتاقى قورلارىن قايتارماق نيەتتە. ءقازىر ءتيىستى ۇسىنىس ۇكىمەتتىڭ قاراۋىندا. دەسە دە، ءبىرىڭعاي زەينەتاقى جيناقتاۋشى قورى حالىق اقشاسىن ءبىر قولدا ۇستاۋ قۇقىعىن وزىنە قالدىرىپ وتىر. سالىمشىلار قورمەن ارنايى كەلىسىم جاساپ، زەينەتاقى اقشاسىن ۇلتتىق بانك ارقىلى الىپ شىعىپ، جەكەگە سالادى. باس بانكير دانيار اقىشيەۆ باسەكەلى ورتادا دا حالىق اقشاسىنىڭ تالان-تاراجعا تۇسپەۋىن قاتاڭ قاداعالايمىز دەپ سەندىرىپ وتىر.

 

https://dalanews.kz/27169