قارجىلىق مونيتورينگ اگەنتتىگى جىل باسىنان بەرى 20 ملرد تەڭگەگە جۋىق شىعىنمەن قارجى پيراميدالارىن قۇرۋ جانە باسقارۋ فاكتىلەرى بويىنشا 57 قىلمىستىق ءىستى تەرگەدى. مۇنداي كۇماندى ۇيىمدارعا 21 مىڭنان اسا ازامات تارتىلعان. ونىڭ ناتيجەسى بويىنشا 12 ملرد تەڭگەدەن استام قاراجات وتەلدى، دەپ حابارلايدى Dalanews.kz.
اگەنتتىكتە الاياقتىق جوبالاردىڭ ومىرلىك سيكلىن جانە ولارعا تارتىلعان سالىمشىلار سانىن قىسقارتۋعا باعىتتالعان "قارجى پيراميدالارىنا قارسى ءىس-قيمىل" ارنايى جوباسى ەنگىزىلدى.
ماسەلەن، الماتىدا HitBeatMusic قارجى پيراميداسىن قۇرۋ جانە باسقارۋ فاكتىسى بويىنشا سوتقا دەيىنگى تەرگەۋ اياقتالدى.
"الاياقتار وزدەرىن كانادالىق كومپانيانىڭ اكسيونەرى جانە يەسى رەتىندە تانىستىرىپ، مۋزىكالىق ينۆەستيسيالىق جوبا قىزمەتىنە ءىس جۇزىندە قاتىسى جوق كومپانيانىڭ اكسيالارىن ساتۋمەن اينالىسقان. وسىلايشا، سالىمشىلاردىڭ قاراجاتىن تارتىپ، ەنگىزىلگەن سومانىڭ 10-نان 15% - نا دەيىن پايداسىن ۋادە ەتتى. كەلتىرىلگەن زالال سوماسى 255 ملن تەڭگەنى قۇرايدى"، دەلىنگەن 2024 جىلى 17 قازاندا تاراتىلعان قما حابارلاماسىندا.
سوت ۇكىمىمەن اتالعان ادامدار كىنالى دەپ تانىلىپ، 5 جىلدان 6 جىلعا دەيىنگى مەرزىمگە باس بوستاندىعىنان ايىرىلدى.
سونداي-اق اگەنتتىك IT-قۇرالداردى پايدالانا وتىرىپ، الەۋمەتتىك جەلىلەرگە تالداۋ جاسايدى.
2024 جىلى قارجى پيراميدالارىنىڭ بەلگىلەرى بار 10،5 مىڭنان اسا سايت سىلتەمەلەرى بۇعاتتالدى. WhatsApp، Telegram جانە Instagram-دا 292 چات بۇعاتتالعان.
وسىلايشا، 2 ملن استام الەۋەتتى سالىمشىلاردىڭ قارجىلىق شىعىندارىنىڭ الدىن الدى.
"قارجى پيراميدالارىنا قارسى ءىس-قيمىل" ارنايى جوباسى جۇزەگە اسىرىلا باستاعاننان بەرى Qnet، World Business Consulting، Finiko Antares/Antares Trade، Sincere Systems Group/S-Group، Hermes LTD، Life is good، Chia Tai Tianding/Chia Tai Pharmaceutical Energy Eolus Oazqstan/Eolus سياقتى ەلدە جۇمىس ىستەيتىن قارجى پيراميدالارىنىڭ قۇرىلىمدىق بولىمشەلەرىنىڭ ۇيىمداستىرۋشىلارى جاۋاپكەرشىلىككە تارتىلدى"، دەلىنگەن حابارلامادا.
قما ادام اقشا سالعىسى كەلەتىن كومپانيانى قارجى پيراميداسىنىڭ بەلگىلەرىنە تەكسەرۋگە مۇمكىندىك بەرەتىن تەلەگرام بوتتى ىسكە قوستى.
سونىمەن قاتار، مۇنداي قۇقىق بۇزۋشىلىقتار ءۇشىن ۇستالعان بارلىق جالعان جوبالاردىڭ ءتىزىمى مىنا ارادا جاريالانعان.
