قازاقستاننىڭ اۋماعىندا قارجى پيراميدالارى ءالى دە بولسا ايىلدارىن جيار ەمەس. قۇقىق قورعاۋ ورگاندارى تاراپىنان الاياقتارمەن كۇرەس اياۋسىز جۇرگىزىلىپ جاتىر. دەسە دە، قالىڭ بۇقارانى قان قاقساتقانداردىڭ قاتارى سيرەگەن جوق. وسى ورايدا، ءبىز سوڭعى ايلاردا عانا قۇرىقتالعان قارجى پيراميدالارى تۋرالى از-كەم ايتا كەتكەندى ءجون كوردىك...

ماۋسىمنىڭ ورتاسىندا عانا اقتوبەدە قارجى پيراميداسى ءىسى بويىنشا 30-دان استام سوتتالۋشى اشتىق جاريالادى. بۇل ءىس بويىنشا بارلىعى 48 ادام سوتتالعان بولاتىن. ولار 7 جىلدان 18 جىلعا دەيىنگى مەرزىمگە باس بوستاندىقتارىنان ايىرىلدى. الايدا، سوتتالعاندار بۇل ۇكىمدى تىم اۋىر دەپ سانايدى. سوندىقتان دا اقتوبەدەگى «گارانت 24 لومبارد» قارجى پيراميداسىنىڭ ءىسى بويىنشا تەرگەۋ يزولياتورىندا وتىرعاندار سوت ۇكىمىمەن كەلىسپەگەندەرىن ءبىلدىرىپ، اشتىق جاريالادى.

سوتتالعاندار بىرنەشە كۇن بويى تاماقتان باس تارتتى. تەرگەۋ يزولياتورىنا جينالعان ولاردىڭ تۋىستارى بۇل قادامعا سوت شەشىمىن تىم قاتال دەپ ساناپ، نارازىلىق رەتىندە بارعاندارىن جەتكىزدى.

«مەنىڭ كۇيەۋىم نۇرجان ەلەۋوۆ 11 جىلعا سوتتالدى، ونىڭ كىناسى دالەلدەنبەدى، كىنالى بولسا اشتان جاريالاماس ەدى، ولار ءبىزدى ارسىزدىقپەن اقشا جينادى دەپ ايىپتاپ وتىر. ءبىراق ءبىز اقشا العان جوقپىز. ءبىز جالدامالى جۇمىسشىلار ەدىك، ال قۇرىلتايشىلار ءقازىر كيپردە، تايراڭداپ ءجۇر، ولار ۇستالعان جوق»، – دەيدى سوتتالۋشىلاردىڭ ءبىرىنىڭ ايەلى دينا ەلەۋوۆا.

تەرگەۋ يزولياتورى 33 سوتتالۋشىنىڭ اشتىق جاريالاعانىن مالىمدەگەن ەدى.

«بۇگىن ولاردىڭ تورتەۋى تاماقتانۋدى جالعاستىردى، قالعان 29 سوتتالۋشى مەديسينا قىزمەتكەرلەرىنىڭ باقىلاۋىندا، ال اكىمشىلىكتىڭ ۇستاۋ جاعدايىنا شاعىمدارى جوق. مەنىڭ ويىمشا، بۇگىن نەمەسە ەرتەڭ قالعاندارى تاماقتانۋدى جالعاستىرادى، ماسەلە. شەشىلەدى»، - دەپ ءتۇسىندىردى اقتوبە وبلىسى بويىنشا تۇزەۋ مەكەمەسىنىڭ №70 مەكەمەسىنىڭ باسشىسى امان قۇلمۇحامبەتوۆ.

اقتوبەدە قارجىلىق پيراميدالارعا قاتىستى اتىشۋلى ءىس بويىنشاك كەلتىرىلگەن شىعىننىڭ جالپى سوماسى 30 ميلليارد تەڭگەدەن اسىپ جىعىلادى. ودان ەلىمىزدىڭ 13 وبلىس ورتالىعى مەن ەكى قالاسىنان 17 مىڭنان استام ادام زارداپ شەككەن دەپ تانىلدى.

مامىردىڭ سوڭىن الا جەتىسۋ ءوڭىرى تۇرعىندارىىڭ ايگىلى Q-net قارجى پيراميداسىن ۇيىمداستىرۋشىلارعا 220 ميلليون تەڭگەدەن استام قاراجات بەرىپ قويعانى اشكەرەلەندى. قارجىلىق مونيتورينگ اگەنتتىگى قىزمەتكەرلەرى قارجى پيراميداسىن باسقارعان كۇدىكتىنى ۇستادى. بۇگىندە قۇزىرلى ورگان تالدىقورعاندا Q-net قارجى پيراميداسىن قۇرۋ ىسىنە قاتىستى تەكسەرۋ جۇرگىزىپ جاتىر.

2018-2020 جىلدار ارالىعىندا بۇل قارجى پيراميداسىنىڭ قىزمەتى دۇركىرەپ تۇرعانى ەسىمىزدەن شىعا قويعان جوق. ءتىپتى، ءبىزدىڭ ارىپتەستەرىمىزدىڭ – جۋرناليستەردىڭ ءبىرازى وسى ۇيىمنىڭ قۇرىعىنا ءىلىنىپ ۇلگەرگەن. قازىرگى كەزدە پيراميداعا 231 ازامات الداندى دەگەن دەرەك بار. قالالىقتار پيراميداعا جالپى سوماسى 220 ميلليون تەڭگەدەن استام جەكە قاراجاتتارىن سالىپ ۇلگەرگەن.

سوت قارجىلىق پيراميدانى باسقارعان كۇدىكتىنى ۋاقىتشا قاماۋعا الدى. ءبىزدىڭ بىلۋىمىزشە، سوتقا دەيىنگى تەرگەۋ جالعاسۋدا. باسقا اقپاراتتى قارجىلىق مونيتورينگ اگەنتتىگى جاريالامادى.

وتكەن ايدىڭ سوڭىندا عوي، الماتىدا Hit beat music قارجى پيراميداسىن ۇيىمداستىرۋشىنىڭ تانىستىرىلىمى كەزىندە پوليسيا سالتاناتتى شارانىڭ «شىرقىن» بۇزعانى. بۇل ۇيىم ازاماتتاردى «كانادالىق مۋزىكالىق جوبالارعا ينۆەستيسيالاۋعا» شاقىرعان. الماتىدا پوليسەيلەر Hit beat music قارجىلىق پيراميداسىن ۇيىمداستىرىپ، ونىڭ جارنامالىق تانىستىرىلىمىن جاساماق بولعانداردى ۇستادى.

«Hit Beat Music (HBM Group) ينۆەستيسيا سالاسىنداعى اقپاراتتىق-اناليتيكالىق كومپانيا رەتىندە جاسىرىنىپ، زاڭسىز ارەكەتتەرمەن اينالىسقان. ازاماتتارعا تۇراقتى سىياقىعا «كەپىلدىكپەن» كانادالىق مۋزىكالىق جوبالارعا ينۆەستيسيا سالۋ ۇسىنعان. سونىمەن بىرگە، كومپانيا قازاقستاندا زاڭدى تۇلعا رەتىندە تىركەلمەگەن، وكىلدىگى، فيليالى جانە اشىق بانك شوتى دا جوق بولىپ شىقتى»، - دەپ حابارلادى قارجىلىق مونيتورينگ اگەنتتىگى.

2300-دەن استام سالىمشى ينۆەستيسيانى چەكسىز قولما-قول تابىستاپ ۇلگەرىپتى الاياقتارعا. ال كۇدىكتى ەكى ايعا قاماۋعا الىندى. Hit beat music قىزمەتىنە تاپ بولعانداردان قارجى مونيتورينگى اگەنتتىگىنىڭ 1458، +7 (771) 44-44-570 بايلانىس ورتالىعىنا حابارلاسۋىن سۇرايدى. بۇل ءىس بويىنشا تەكسەرۋ شارالارى ءالى جالعاسىپ جاتىر.

جۋىق ارادا كريپتوۆاليۋتا پيراميداسىن جاساۋشىلار جەزقازعان تۇرعىندارىنان 124 ميلليون تەڭگەدەن استام اقشانى جىمقىرىپ كەتكەنى بەلگىلى بولدى. الدىن الا مالىمەتتەرگە قاراعاندا، 600-دەن استام ادام ينۆەستور اتانعان.

«جوبا MetaGo دەپ اتالادى، ينۆەستورلارعا كريپتوۆاليۋتاعا ينۆەستيسيا سالۋ ۇسىنىلعان. الدىن الا مالىمەتتەر بويىنشا، ۇيىمداستىرۋشىلار 124 ميلليون تەڭگەدەن استام قاراجات جيناعان»، - دەپ جازدى قۇزىرلى ورگاننان.

پيراميدانى جاساعان دەپ جەزقازعان، الماتى جانە استانا قالالارىنىڭ ءتورت تۇرعىنى كۇدىككە ىلىنگەن. بۇگىندە تەرگەۋ ءجۇرىپ جاتىر.

ال قازاقستاندىقتار Hermes قارجى پيراميداسىن ۇيىمداستىرۋشىعا 120 ميلليون تەڭگەدەن استام اقشا بەرىپتى. كۇدىكتى قاماۋعا الىندى. باتىس قازاقستان وبلىسىندا «Life is good» جانە «گەرمەس» جوبالارى ءۇشىن قارجىلىق پيراميدانى ۇيىمداستىردى دەگەن كۇدىكپەن سوتقا دەيىنگى تەرگەۋ باستالدى. قارجىلىق مونيتورينگ اگەنتتىگى اۋماقتىق دەپارتامەنتىنىڭ مالىمەتىنشە، «Hermes management LTD» ج ش س Life is good حولدينگىنىڭ قۇرامىنا كىرەدى.

«ۇيىمداستىرۋشىلار الدانعان ازاماتتارعا 24 پايىزدان 54 پايىزعا دەيىن پايدا تابۋعا ۋادە بەرگەن. قازاقستاندىقتار الاياقتاردىڭ قولىنا 120 ملن تەڭگەدەن استام اقشا ۇستاتقان»، - دەپ اتاپ ءوتتى قما وكىلدەرى.

قارجى پيراميداسىن ۇيىمداستىردى دەگەن كۇدىكتى ۇستالىپ، ەكى ايعا قاماۋعا الىندى. سوتقا دەيىنگى تەرگەۋ جالعاسىپ جاتىر.

مىنە، وسى سەكىلدى جىل باسىنان بەرى قازاقستاندا 22 قارجى پيراميداسى اشكەرە بولىپتى. قارجىلىق مونيتورينگ اگەنتتىگى سوت شەشىمىمەن دالەلدەنگەن جانە مويىندالعان پيراميدالىق سحەمالاردىڭ جاڭارتىلعان ءتىزىمىن جاريالادى.

سوتقا دەيىنگى تەرگەۋدەگى قارجىلىق پيراميدا جوبالارىنىڭ ءتىزىمى مىناداي: كۆازار، چيا تاي تياحينگ، Chia Tai Tianqinq فارماسيەۆتيكالىق توبى، Qnet، ينكرۋيز، QazHome، Life is good LTD حولدينگىنىڭ قۇرامىنا كىرەتىن Hermes management LTD، پك «Best way».

ال قارجى پيراميداسى رەتىندە تانىلىپ، تىيىم سالىنعان ۇيىمدار قاتارى تومەندەگىدەي: LCD Otau Kz، سالتانات، World Business Consulting، «Upgrade-AS» ج ش س، دك «UBW.kz»، «Antares Trade»، «Antares Limited»، Innova Gold، «IG Group KZ» ج ش س، ۇلى مۇنارا، B2B Jewerty، «وتباسىلىق كاپيتال» ج ش س، ۇزدىك جول ينۆەستيسياسى، TheFiniko، «فينستاتۋس» ج ش س، «ProfitGroup» ج ش س، «ايبا-جانيا» ج ش س.

تەرگەۋ اياقتالعان بولجامدى قارجىلىق پيراميدالار (سوت قاراۋىندا): World Business Consulting، دك «UBW.kz»، «انتارەس ليميتەد»، «انتەرەس ترەيد»، Innova Gold، LCD-Otau Kz.

سوت ۇكىمى شىققان پيراميدالىق جۇيەلەردىڭ ءتىزىمى: بىرەگەي قارجى، B2B زەرگەرلىك، كاسپيي كوكك، World Business Consulting، فينيكو، ينۆەستيسيالىق كونسالتينگتىك اگەنتتىك، Eden life، MMK Investment، «شاڭىراق+» («Best Road Investment» ج ش س)، River Coins Limited، «اقشا اعىنى»، «ۇلى بولاشاق»، «نۇر-جيھاز»، «كوشباسشى كاپيتال 168»، «نارىمبەتوۆا»، «اتا-مەكەن 2021» دك، «اينالىم 30%»، «3 كۇندە 30%»، «اسىل ينۆەست»، GAP دك، «تابىس»، «قازاندىق»، «راۋشان كاسساسى»، «4 kn 70%، 5 kn 70%»، «Bay Life»، «برونداۋ»، «Bay Life checks»، «اينالىم»، «Vip چات»، Qnet، Hermes management LTD

جاۋاپتى مەكەمەنىڭ مالىمەتىنشە، جىل باسىنان بەرى 52 000 الەۋمەتتىك جەلى قولدانۋشىسى قارجىلىق پيراميدالارعا قاتىستى مازمۇنعا جازىلۋدان باس تارتقان.

«بيىلدىققا 22 قارجىلىق پيراميدا انىقتالدى، كيبەرقاداعالاۋ جۇيەسىندە 4000-عا جۋىق سايتتار مەن اككاۋنتتار بۇعاتتالدى. وسى باعىتتاعى شارۋالار بۇدان بىلاي دا جالعاسا بەرەتىن بولادى. ازاماتتاردان كۇماندى قارجى كوزدەرىنە اقشا اۋدارۋدا ساق بولۋدى سۇرايمىز»، - دەپ جازدى قارجىلىق مونيتورينگ اگەنتتىگىنەن.