قاراعاندىدا 200 مىڭعا جۋىق ادام عانا تۇراتىن اۋداندى بەزەندىرۋگە 950 ميلليون تەڭگە اقشا جۇمسالماق، - دەپ حابارلايدى Dalanews.kz.
اڭگىمە قالاداعى قازىبەك بي اۋدانى جايلى بولماق. اشىق دەرەككوزدەگى مالىمەت بويىنشا، اۋداندا 192 مىڭ ادام تۇرادى.
مەملەكەتتىك ساتىپ الۋ پورتالىندا اۋدانعا قاتىستى قىزىق لوت پايدا بولعان. تاپسىرىس بەرۋشى - قازىبەك بي اۋدانى اكىمدىگىنىڭ اپپاراتى. اۋداندا الداعى ءۇش جىلدا بولاتىن مەرەكەلەر كەزىندە بەزەندىرۋگە 950 ميلليون تەڭگە جۇمسالماق. كونكۋرسقا قاتىسۋعا وتىنىشتەر 20 ناۋرىزعا دەيىن قابىلدانادى.
بۇل قارجى بىرنەشە مەيرام كۇندەرى اۋداندى بەزەندىرۋگە جۇمسالاتىن كورىنەدى. ونىڭ ىشىندە، حالىقارالىق ايەلدەر كۇنى، ناۋرىز مەيرامى، بىرلىك كۇنى، وتان قورعاۋشىلار كۇنى جانە تاعى باسقالارى بار.
ايتا كەتەيىك، بۇعان دەيىن تالدىقورعاندا شەنەۋنىكتەر بەلگىسىز كوشەلەردى "جوندەۋگە" قىرۋار قارجى جۇمساماق بولعانى انىقتالعان ەدى. قۇنى 500 ميلليون تەڭگەدەن اساتىن قالا كوشەلەرىن جوندەۋگە كونكۋرس جاريالانعان كەزدە تاپسىرىس بەرۋشى جوندەۋدى قاجەت ەتەتىن كوشەلەردىڭ اتاۋلارىن ناقتىلاماعان، ءار كوشەدەگى جۇمىستىڭ سمەتالىق قۇنىن انىقتاماي، اقاۋلى اكتىلەردى ۇسىنباعان.
