Qarmet كومپانياسىنىڭ شاحتالارىندا كومىردى قۇرعاق بايىتۋعا ارنالعان زاماناۋي كەشەندەر قۇرىلىسى جوباسى جۇزەگە اسىرىلۋدا. بۇل باستاما ءوندىرىستىڭ تيىمدىلىگىن، ەكولوگيالىق تازالىعىن جانە تەحنولوگيالىق دەڭگەيىن ارتتىرۋعا باعىتتالعان كومپانيانىڭ اۋقىمدى جاڭعىرتۋ باعدارلاماسىنىڭ ءبىر بولىگى، دەپ حابارلايدى Dalanews.kz.
جوبا بىردەن ءتورت شاحتادا ىسكە اسىرىلۋدا: «شاحتينسك»، «قازاقستان»، «اباي» جانە ت. كۇزەمبايەۆ اتىنداعى شاحتا. ونىڭ نەگىزگى مىندەتى – كومىر ساپاسىن ءوندىرۋ كەزەڭىنىڭ وزىندە جاقسارتىپ، شيكىزاتتى ءارى قاراي وڭدەۋگە دايىنداۋ.
جاڭا كەشەندەر شاعىن فورماتتاعى بايىتۋ قوندىرعىلارى، ياعني تولىق وڭدەۋ سيكلىن قامتاماسىز ەتەتىن ميني-فابريكالارلان تۇرادى. ول شيكىزاتتى بەرۋ مەن ۇساتۋدان باستاپ بايىتۋ جانە دايىن ءونىمدى قويماعا دەيىن جەتكىزۋگە دەيىن جۇمىس ىستەيدى. ءار كەشەننىڭ ونىمدىلىگى ساعاتىنا شامامەن 300 توننا، ال جوعارى دەڭگەيدەگى اۆتوماتتاندىرۋ وندىرىستىك پروسەستەردىڭ سەنىمدىلىگى مەن تۇراقتىلىعىن ارتتىرۋعا مۇمكىندىك بەرەدى.
جوبانىڭ نەگىزىندە سۋدى پايدالانۋدى قاجەت ەتپەيتىن اۋا ارقىلى ءبولۋ تەحنولوگياسى جاتىر. بۇل شەشىم كومىر بايىتۋ ءتاسىلىن تۇبەگەيلى وزگەرتىپ، پايدالانۋ شىعىندارىن ازايتادى جانە قورشاعان ورتاعا اسەردى بارىنشا تومەندەتەدى.
«بۇل تەحنولوگيانىڭ نەگىزگى قاعيداسى – سۋدان تولىق باس تارتۋ. كومىر مەن جىنىستى ءبولۋ اۋا اعىنىنداعى تىعىزدىق ايىرماشىلىعى ارقىلى جۇزەگە اسادى. بۇل ەكولوگيالىق قاۋىپسىزدىكتى ارتتىرادى، شىعىنداردى ازايتادى جانە كليماتتىق جاعدايعا قاراماستان جابدىقتىڭ تۇراقتى جۇمىسىن قامتاماسىز ەتەدى»، — دەدى «شاحتينسك» شاحتاسىنىڭ كۇردەلى قۇرىلىس جونىندەگى باس ينجەنەرى ورىنباسارى ۆاسيليي بارابانوۆ.
ەكولوگيالىق اسپەكتىلەرگە ەرەكشە نازار اۋدارىلعان: سۋدى پايدالانۋدىڭ بولماۋى سۇيىق قالدىقتاردىڭ پايدا بولۋىن بولدىرمايدى، ال بولىنگەن جىنىس قوسىمشا وڭدەۋسىز-اق ءقاۋىپسىز تۇردە ۇيىندىگە جىبەرىلەدى.
«ءبىز كومىردىڭ كۇلدىلىگىن تومەندەتىپ، سونىڭ ەسەبىنەن “ۆوستوچنايا” ورتالىق بايىتۋ فابريكاسىنىڭ تيىمدىلىگىن ارتتىرامىز. وڭدەۋگە بۇدان دا ساپالى شيكىزات تۇسەتىن بولادى»، — دەپ قوستى ۆاسيليي بارابانوۆ.
كەشەندەرگە ارنالعان جابدىقتار جەتكىزىلگەن جانە قازىرگى ۋاقىتتا كەدەندىك راسىمدەۋدەن وتۋدە. الداعى ۋاقىتتا قىزمەتكەرلەر جابدىقتاۋشى كومپانيا وكىلدەرىنىڭ قاتىسۋىمەن ارنايى وقىتۋدان وتەدى.
جوبانى جۇزەگە اسىرۋ Qarmet كومپانياسىنىڭ كومىر ءوندىرۋ اكتيۆتەرىن جۇيەلى جاڭعىرتۋدىڭ ءبىر بولىگى بولىپ تابىلادى. كومپانيا زاماناۋي تەحنولوگيالاردى كەزەڭ-كەزەڭىمەن ەنگىزۋ ارقىلى ءوندىرىس ونىمدىلىگىن، قاۋىپسىزدىگىن جانە ەكولوگيالىق ستاندارتتاردى ارتتىرىپ، كاسىپورىننىڭ دا، تۇتاس سالانىڭ دا تۇراقتى دامۋىن قامتاماسىز ەتۋدە.
