Qarmet kompanıasynyń shahtalarynda kómirdi qurǵaq baıytýǵa arnalǵan zamanaýı keshender qurylysy jobasy júzege asyrylýda. Bul bastama óndiristiń tıimdiligin, ekologıalyq tazalyǵyn jáne tehnologıalyq deńgeıin arttyrýǵa baǵyttalǵan kompanıanyń aýqymdy jańǵyrtý baǵdarlamasynyń bir bóligi, dep habarlaıdy Dalanews.kz.

Joba birden tórt shahtada iske asyrylýda: «Shahtınsk», «Qazaqstan», «Abaı» jáne T. Kúzembaev atyndaǵy shahta. Onyń negizgi mindeti – kómir sapasyn óndirý kezeńiniń ózinde jaqsartyp, shıkizatty ári qaraı óńdeýge daıyndaý.

Jańa keshender shaǵyn formattaǵy baıytý qondyrǵylary, ıaǵnı tolyq óńdeý sıklin qamtamasyz etetin mını-fabrıkalarlan turady. Ol shıkizatty berý men usatýdan bastap baıytý jáne daıyn ónimdi qoımaǵa deıin jetkizýge deıin jumys isteıdi. Ár keshenniń ónimdiligi saǵatyna shamamen 300 tonna, al joǵary deńgeıdegi avtomattandyrý óndiristik prosesterdiń senimdiligi men turaqtylyǵyn arttyrýǵa múmkindik beredi.

Jobanyń negizinde sýdy paıdalanýdy qajet etpeıtin aýa arqyly bólý tehnologıasy jatyr. Bul sheshim kómir baıytý tásilin túbegeıli ózgertip, paıdalaný shyǵyndaryn azaıtady jáne qorshaǵan ortaǵa áserdi barynsha tómendetedi.

«Bul tehnologıanyń negizgi qaǵıdasy – sýdan tolyq bas tartý. Kómir men jynysty bólý aýa aǵynyndaǵy tyǵyzdyq aıyrmashylyǵy arqyly júzege asady. Bul ekologıalyq qaýipsizdikti arttyrady, shyǵyndardy azaıtady jáne klımattyq jaǵdaıǵa qaramastan jabdyqtyń turaqty jumysyn qamtamasyz etedi», — dedi «Shahtınsk» shahtasynyń kúrdeli qurylys jónindegi bas ınjeneri orynbasary Vasılıı Barabanov.

Ekologıalyq aspektilerge erekshe nazar aýdarylǵan: sýdy paıdalanýdyń bolmaýy suıyq qaldyqtardyń paıda bolýyn boldyrmaıdy, al bólingen jynys qosymsha óńdeýsiz-aq qaýipsiz túrde úıindige jiberiledi.

«Biz kómirdiń kúldiligin tómendetip, sonyń esebinen “Vostochnaıa” ortalyq baıytý fabrıkasynyń tıimdiligin arttyramyz. Óńdeýge budan da sapaly shıkizat túsetin bolady», — dep qosty Vasılıı Barabanov.

Keshenderge arnalǵan jabdyqtar jetkizilgen jáne qazirgi ýaqytta kedendik rásimdeýden ótýde. Aldaǵy ýaqytta qyzmetkerler jabdyqtaýshy kompanıa ókilderiniń qatysýymen arnaıy oqytýdan ótedi.

Jobany júzege asyrý Qarmet kompanıasynyń kómir óndirý aktıvterin júıeli jańǵyrtýdyń bir bóligi bolyp tabylady. Kompanıa zamanaýı tehnologıalardy kezeń-kezeńimen engizý arqyly óndiris ónimdiligin, qaýipsizdigin jáne ekologıalyq standarttardy arttyryp, kásiporynnyń da, tutas salanyń da turaqty damýyn qamtamasyz etýde.